InfoHub Logo

Ózge eldiń atynan soǵysqandar sottalady – İİM eskertý jasady,dep habarlaıdy Infohub.kz.

Qazaqstan azamattaryna bóten eldiń áskerı áreketterine qatysqany úshin qatań jaza qarastyrylǵan. İshki ister mınıstrligi qazaqstandyqtarǵa taǵy bir márte eskertý jasap, shet memleketterdiń áskerı qaqtyǵystaryna qatysqan jaǵdaıda 5 jyldan 9 jylǵa deıin bas bostandyǵynan aıyrylýy múmkin ekenin málimdedi. Al jaldap soǵysqan jaǵdaıda jaza odan da aýyr – ómir boıyna sottalýy múmkin.

Bul málimdeme Ýkraına Qorǵanys mınıstrliginiń «Ómir súrgim keledi» jobasy aıasynda jarıalanǵan derekterden keıin jasaldy. Jobada reseılik armıa quramynda 661 Qazaqstan azamaty soǵysyp jatyr, al onyń 78-i maıdanda qaza tapqany aıtylǵan.

Sonymen qatar, áleýmettik jelilerde Reseı armıasyna jaldamaly sarbaz retinde qatysýǵa úgitteıtin jarnamalar kóbeıip ketken. Ortalyq Azıadan kelgenderge 3,5 mln rúbl kóleminde syıaqy ýáde etiledi.

Sarapshylar mundaı usynystarǵa senip, azamattardyń soǵysqa attanyp jatqanyna alańdaýly. Olar qarjylaı qyzyǵýshylyqtyń saldary qaıtar joly joq sheshimge aparyp soǵatynyn eskertedi.