InfoHub Logo

AQSH pen Qytaı arasyndaǵy saýda shıelenisi jańa beleske kóterildi. Aq úıdiń baspasóz hatshysy Kerolaın Lıvıtttiń málimdeýinshe, prezıdent Donald Tramp Qytaıǵa salynǵan baj salyǵyn 104%-ǵa kóterý týraly sheshim qabyldady. Jańa tarıfter búginnen bastap kúshine enedi.Bul týraly Infohub.kz habarlaıdy.

Buǵan deıin Tramp Qytaıdan qarymta tarıfterden bas tartýdy talap etken bolatyn. Alaıda Beıjiń AQSH-pen sońyna deıin kúresýge daıyn ekenin ashyq jetkizdi. Aq úı ókili muny Qytaı tarapynan "úlken qatelik" dep baǵalady.

> «Prezıdent Amerıkaǵa shabýyl jasalǵanda, jaýyna eki ese soqqy beredi. Qytaı kelisimge kelýdiń ornyna jaýap qaıtarýdy tańdady. Bul – strategıalyq qate», – dedi Lıvıtt.

Álemdik ekonomıkanyń eki alyby arasyndaǵy bul teketires endi ashyq saýda soǵysyna aınalǵandaı.

Ótken aptada Tramp tek Qytaımen ǵana emes, álemniń basqa elderine de qarymta salyq engizgen bolatyn. Aq úıdiń málimetinshe, 70-ke jýyq memleket kelissózder júrgizýge ótinish bildirgen. Al Eýroodaq Tramptyń bul áreketine jaýap retinde qarsy shabýyl amaldaryn qarastyryp jatyr.

Sonymen birge, Tramp Eýropaǵa jeńildikter jasaý úshin AQSH-tan 350 mlrd dollar kóleminde energetıkalyq shıkizat satyp alýdy usyndy. Onyń pikirinshe, bul saýda tapshylyǵyn azaıtyp, salyqtyq júktemeni tómendetýge kómektesedi.