InfoHub Logo

Fatıh Sultan Mehmet Han Osman ımperıasyn gúldendirgen, Vızantıa ımperıasyn jeńip Stambul qalasynyń alynýy sekildi jarqyn jeńisterimen tarıhta óshpes iz qaldyrǵan, óte batyr, óte aqyldy jáne óte keremet jetilgen saıasatker patsha bolǵan. Osy Fatıh Sultan Mehmet han bala kezinde tym erke bolatyn. Sabaq kezindegi erkeligimen ustazy Aqshamseddındi sharshatyp jiberetin. Urysqan jaǵdaıda: «Men patshanyń balasymyn maǵan eshteńe isteı almaısyń» dep qorqytatyn. Ustaz patshaǵa shaǵymdanýdy ádepsizdik bolar dep biraz ýaqyt sabyr etip júredi. Alaıda erkeligi tym shekten shyǵa bastaǵanynda, amalsyz ákesi İİ Murat hannyń aldyna kirýdi uıǵarady. Patshaǵa kelip jaǵdaıdy aıtqanynda İİ Murat han ustazdyń qulaǵyna bul jaǵdaıdyń sheshimin sybyrlaıdy. Ustaz tań qalady. Mundaı áreketke bara almaıtyndyǵyn aıtsa da patsha osy jospardy oryndaý kerektigin aıtty. Erteńine kishkentaı Mehmet taǵy burynǵysha erkeleıdi. Ustazy doǵarýyn aıtqanynda taǵy da ákesimen qorqyta bastady. Sol sátte ishke patsha kirip keldi. Ustaz ashýlanyp patshaǵa ursyp berdi, bulaı jaıbaraqat kirýge bolmaıtyndyǵyn, esikti qaǵyp ruqsat surap kirý kerektigin aıtyp arqasynan dúre soǵyp, qýyp shyqty. Patsha basy salbyraǵan kúıde keshirim surap shyǵyp ketti. Bul jaǵdaıdy baqylap otyrǵan Fatıh tili tutylyp ne aıtaryn bilmeı abdyrap qaldy. Senip otyrǵan ákesi kóz aldynda taıaq jegen edi. Kózderi alaq julaq otyrǵanynda esik qaǵylyp patsha keshirim ótinip, ruqsat surap ishke kirdi. Jospar keremet túrde júzege asqan edi. Osy kúnnen bastap Fatıh sultan erkeligin doǵaryp ustazynyń aıtqanyn eki etpeıtin boldy.

Munda bizdiń zamanymyzdaǵy balasynyń aıtqanyn eki etpeıtin ata-analarǵa da tıesili ǵıbrat bar.

---