InfoHub Logo

Pedagogtyń ózin-ózi kásibı kemeldendirýi – pedagogtyq qasıetterdi muǵalim óz aldyna qoıatyn sharttar men talaptarǵa sáıkes jetildirip, damytýǵa baǵyttalǵan proses. 

Pedagogtyń tabysty ózin-ózi kemeldendirýi talap shegi onyń qazirgi daǵdylary men mashyqtarynan nedáýir joǵary qoıylady degendi bildiredi, olaı bolmaǵan jaǵdaıda qolda bar men qalanatynnyń arasynda qaıshylyqtar paıda bolyp, ózin jetildirý úshin atqarylatyn jumystar esh nátıje ákelmeıdi.

Pedagogtyń ózin-ózi kemeldendirý isindegi jumys órisi barynsha keń. Kez kelgen pedagogtyq mashyqta sheberlikti shyńdaı berýge bolady. Ózin-ózi kemeldendirýjolynda aldyna mindet qoıýda qatelespeý úshin, pedagogtyń kásibı qyzmetine qoıylatyn standart talaptardy anyqtap alaıyq.

1. Bilimdi bolý. Bir kisi pedagogty aısbergke teńegen eken. Aısbergtiń ushar basy ǵana jurtqa kórinedi, al tereńde qandaı qýatty kúsh jatqanyn biletinder az. Ár pedagog eń aldymen joǵary bilimdi, dúnıetanymy keń adam bolýy tıis.

2. Balalardy jaqsy kórý jáne olarmen til tabysa bilý – muǵalimniń kásibı qasıetterine qoıylatyn basty talaptardyń biri. Tek balalarǵa degen shynaıy qatynas, olardyń basyna bilim salyp, oılanýdy úıretýge degen shynaıy nıet qana muǵalimge kásibı qyzmetinde bıik nátıjege qol jetkizýge múmkindik beredi.

3. Oqytý ádistemelerin meńgerý de – pedagogtyń ajyramas kásibı qasıeti. Pedagog ondaı ádistemelerdi neǵurlym jaqsyraq meńgerse, onyń sabaqtary da soǵurlym jemisti bolmaq.

4. Sabaqtyń qurylymyna, materıaldy baıandaýǵa shyǵarmashylyq turǵydan qaraý. Ár jańa sabaq – baıandalatyn materıaldy qaıtadan «bastan keshirý». Ol neǵurlym qyzyqtyraq usynylsa, oqýshylar da ony ońaıyraq ıgeredi.

5. Balanyń ár jasyna laıyq psıhologıany bilý. Bul pedagogtyń negizgi bilimderiniń biri, ol oqýshylardyń kóptegen qylyqtarynyń sebepterin anyqtaýǵa kómektesedi.

Joǵaryda atalǵan talaptardyń barlyǵy pedagogtyń kásibı qyzmeti úshin aıryqsha mańyzdy.

Alaıda, ár muǵalim tek óz qasıetterin óz betimen saraptaı kele jáne olardy talaptarǵa sáıkestendire otyryp qana óziniń kásibı qasıetterine baǵa berip, qaı tusyn aldymen jetildirý kerek ekenin seze alady. Pedagogtyń ózin-ózi kásibı kemeldendirýi– pedagogtyń óz qolymen isteletin sharýa! 

---