InfoHub Logo

Aqtóbe-Almaty baǵytyndaǵy poıyz jolaýshysy, 70 jastaǵy er adamnyń uıyqtap jatqan qyzǵa tıiskeni týraly daýly jaǵdaı áleýmettik jelide keńinen talqylandy. Jábirlenýshiniń ózi bul oqıǵany vıdeoǵa túsirip, qoǵam nazaryna usynǵan.

Bul týraly Infohub.kz aqparat agenttigi habarlaıdy.

Oqıǵanyń mán-jaıy

Boıjetkenniń aıtýynsha, 14 mamyr kúni tún ortasynda, tómengi orynda uıyqtap jatqanda, beıtanys zeınetker onyń denesine qol salady. Shoshyp oıanǵan qyz qart kisini uryp jibergende, ol keshirim surap, teris qarap jatyp qalǵan. Keıin qyz bolǵan jaǵdaıdy janyndaǵy áıelge aıtyp shaǵymdanǵanymen, ekeýi kelesi stansıadan asyǵys túsip ketken.

«Ol áıel maǵan: «Seni zorlady ma? Tıisse, qaǵyp tastap jata bermeısiń be?» dedi. Men qatty kúızeliske ushyradym, tórt kúnnen beri uıyqtaı almaı júrmin. Al psıhologqa baratyn aqsham joq», — dep kúızelisin bildirgen stýdent.

Ol sondaı-aq, mundaı áreket úshin taǵaıyndalǵan jazanyń tym jeńil ekenine de narazylyq bildirdi.

Polısıanyń áreketi

Kóliktegi polısıa departamenti bul derekti rastap, 70 jastaǵy jolaýshynyń Túrksib stansıasynda ustalǵanyn málimdedi. Tártip saqshylary is materıaldaryn usaq buzaqylyq babymen sotqa joldaǵan.

«Almaty qalasynyń mamandandyrylǵan aýdanaralyq ákimshilik sotyna qaraýǵa joldandy. Sot sheshimimen quqyq buzýshy kináli dep tanylyp, oǵan 20 AEK (86 500 teńge) mólsherinde aıyppul salyndy», — dep habarlady vedomstvonyń baspasóz qyzmeti.