InfoHub Logo

Prezıdent Qasym-Jomart Toqaev Almatydaǵy «Baǵanashyl» balalar úıiniń tárbıelenýshilerin Qonaev qalasyna kóshirý prosesin dereý toqtatýdy tapsyrdy. Bul týraly Aqorda resmı habarlady.

Memleket basshysy Almaty qalasynyń ákimi Darhan Satybaldyǵa balalardyń ońtústik astanada bilimin jalǵastyrýyna jaǵdaı jasaý úshin balalar úıine jóndeý júrgizip, ony qalalyq menshikke qabyldaýdy júktedi.

«Memleket basshysynyń tapsyrmasyna sáıkes, balalar úıi kóshirilmeıdi. Atalǵan jaǵdaıǵa baılanysty Prezıdent Ákimshiligi qyzmettik tekseris júrgizedi. Ata-anasynyń qamqorlyǵynsyz qalǵan balalardyń zań sheńberindegi barlyq quqyǵy tolyq saqtalady», — delingen Prezıdent baspasóz qyzmetiniń málimdemesinde.

Eske salsaq, buǵan deıin 21 shildede Almatydaǵy №1 balalar úıiniń tárbıelenýshilerin Qonaev qalasyna kóshirý bastalǵan edi. Biraq jetim balalar buǵan deıin birneshe ret kóshýge úzildi-kesildi qarsy ekenin aıtqan.

Qoǵamda rezonans týdyrǵan bul sheshimge burynǵy balalar ombýdsmeni, quqyq qorǵaýshy Arýjan Saın da pikir bildirip, balalardyń pikirinsiz jasalǵan kóshirýdiń BUU Bala quqyqtary týraly konvensıasy men ulttyq zańnama talaptaryn buzatynyn aıtqan bolatyn. Onyń aıtýynsha, Qonaevtaǵy mekemede qajetti ınfraqurylym men oqý jaǵdaıy jasalmaǵan.

Bul jaǵdaı qoǵamnyń belsendi qarsylyǵyn týdyryp, memlekettik deńgeıde jedel sheshim qabyldaýǵa sebep boldy.