InfoHub Logo

Memleket basshysy Qasym-Jomart Toqaev A.N. Syzǵanov atyndaǵy Ulttyq ǵylymı hırýrgıa ortalyǵynyń ujymyna erekshe alǵys bildirdi. Jýyrda atalmysh ortalyqta elimizde alǵash ret bir ýaqytta úsh naýqasqa úsh túrli donordyń búıregi toǵyspaly transplantasıa ádisimen sátti aýystyryldy.

Prezıdent bul biregeı operasıany jetekshilik etken profesor, belgili hırýrg Bolatbek Baımahanov bastaǵan mamandar tobynyń kásibı biliktiligi men joǵary deńgeıdegi sheberliginiń nátıjesi ekenin atap ótip, bul otandyq medısınanyń úlken jetistigi dep baǵalady.

Memleket basshysynyń Alǵys hatynda:
– Densaýlyq saqtaý júıesin damytý – elimizdiń strategıalyq basym baǵyttarynyń biri. Bul baǵytta kóptegen aýqymdy bastamalar qolǵa alynyp, ulttyq medısınanyń áleýeti artyp keledi. Sizderdiń sátti ótkizgen toǵyspaly transplantasıa operasıalaryńyz – osy ilgerileýdiń jarqyn kórinisi. Qazirgi tańda Qazaqstan kúrdeli transplantasıalyq operasıalardy joǵary deńgeıde oryndaı alatyn álemdegi sanaýly alty memlekettiń qataryna endi. Bul jetistikke sizderdiń kásibılikterińiz, tereń bilimińiz ben mol tájirıbeńiz arqasynda qol jetkizildi. Barshańyzǵa shynaıy alǵysymdy bildiremin. Aldaǵy ýaqytta da halyqtyń densaýlyǵyn saqtaý jolyndaǵy eńbekterińiz jemisti bolaryna senemin, – delingen.

Aıta keteıik, bul kúrdeli operasıa elimizdegi transplantologıa salasyndaǵy mańyzdy serpilis retinde baǵalanyp otyr.