InfoHub Logo

(Ertegi-qoıylym)

(Sahnada saqal-murty appaq qart adam kitap oqyp, jazý jazyp otyrady. Avtor qyz shyǵyp, ertegini bastaıdy.)

Avtor:

— Erte, erte, ertede, Qalampyr atty qyz bala ómir súripti. Qalampyr jalqaý, kóp uıyqtaıtyn, aıtqan tildi almaıtyn tilazar bolypty.  Anasy qyzyn qalaı ózgerterin bilmeı, bir danyshpan qarıaǵa barypty.
(Sahnaǵa qyzdyń anasy shyǵady.)
Ana:
— Sálem berdik, ata! Sizge bir sharýamen kelip edim. Maǵan kómektesińizshi..?! 
Qarıa:
— Qosh keldiń, qyzym! Ne sharýa? 
Ana:
— Ata, jalǵyz qyzym bar edi. Ómiri uıqymen, oıynmen ótip barady. Sol qyzymdy qalaı ózgertsem bolady?
Qarıa:
— Qyzyńa 24 altyn teńge ber de, kúnin úshke ból. 8 saǵatyn uıqyǵa, 8 saǵatyn bilimge, 8 saǵatyn tamaqtaný men úı sharýasyna jumsasyn.  Ár paıdasyz ótkizgen saǵattary úshin, altyn teńgelerin qaıtaryp alyp otyr.
Ana:
— Bul tásil áser ete me eken?
Qarıa:
— Adam úshin ýaqyt mańyzdy bolmaýy múmkin. Biraq altyn mańyzdy. Osy aıtqandy synap kór!
Ana:
— Jaqsy, raqmet! Kóreıin. Saý bolyńyz!
(Ekeýi eki jaqqa ketedi. Sahnaǵa Qalampyr shyǵady. Bir qolynda telefon. Bir qolynda alma. Úı shashylyp jatady. Osy kezde sahnaǵa anasy shyǵady.)
Ana:
— Qalampyr, qyzym! Kel, otyrshy! Búginnen bastap ekeýmiz oıyn oınaıyqshy...?!
Qalampyr:
— Qandaı oıyn, anashym?  Álbette oınaımyn!
Ana:
— Men saǵan 24 altyn beremin. Onyń segizin túngi uıqyń úshin tóleımin. Eger túngi onda jatyp, tańǵy altyda turmasań, ár oıaý júrgen saǵatyń úshin bir altynyńdy alyp qoıamyn.
Qalampyr:
— Qyzyq eken!
Ana:
— Qyzyq alda! Kúnine segiz saǵat bilim alasyń. Sol ýaqytta bos nársemen aınalysyp, telefonmen oıyn oınap ketseń, taǵy da altynyńnan aırylasyń!
Qalampyr:
— Anashym! Olaı bolmaıdy ǵoı..?!  (Burtıyp, ókpelep qalady.)
Ana:
— Eger kúndiz maǵan úı sharýasyna kómektesip, dalada taza aýada oınamasań, til almaǵanyń úshin taǵy da altynyńnan alyp otyramyn! Al myna altyndardy seniń qolyńa tek bir aıdan soń beremin. 
Qalampyr (kóńilsiz):
— Jaqsy!
Avtor:
— Osy kúnnen bastap Qalampyr, adam tanymastaı ózgerdi. (Sahnaǵa 4-5 qyz shyǵady.)
Qurbylary:
— Qalampyr, oınaısyń ba?
Qalampyr:
— Joq, men qazir bos emespin! Anam jibergende oınaımyn!

1-qyz: 

— Ortaǵa túspek oınaıyq dep jatyrmyz. 

2-qyz: 

— Álde telefon kórip otyrsyń ba? 

Qalampyr: 

— Joq qyzdar! Meniń telefon kórýge ýaqytym joq.  Úı jınaýym kerek. 

3-qyz: 

— Durys!  Anańa kómekteskeniń jaqsy. Bosaǵanda habarlas. Birge oınaımyz? 

Qalampyr: 

— Raqmet qurbylarym! Álbette, taza aýada oınaǵanǵa ne jetsin?! 
(Qyzdar ketedi. Sahnaǵa Telefon (keıpindegi) oqýshy shyǵady)
Telefon:
— Qalampyr, ekeýmiz únemi oınaýshy edik qoı? Kel, oınaıyq?
Qalampyr:
— Renjime dosym! Maǵan úı jınaý kerek. Al sen qury turmaı, maǵan ıýtýb arnasynan paıdaly málimet aıtyp otyr. 

Telefon: 

— Qandaı málimet qajet? 

Qalampyr: 

— Qazaq ádebıeti klasıkteriniń kitabynan úzindi oqyp bershi?
(Osy kezde «Uıqy» degen jazýy bar, bult sekildi ádemi, jyltyraq kıim kıgen oqýshy shyǵady.) 
Uıqy:
— Qalampyr, kitap tyńdaı berip, ishiń pysqan shyǵar? Kel, azyraq myzǵyp alsańshy?
Qalampyr:
— O, o, Uıqy! Bul sen be?! Renjime dosym. Seni túngi onda kútemin. Keshikpeı kel! Al qazir men mazalama! Bara ber!
(Basy salbyraǵan uıqy kóńilsiz shyǵyp ketedi.)
Avtor:
— Osylaı Qalampyr óz ómirine ámirin júrgizetin nárselerdi tártipke salyp, úlken jetistikke qol jetkizipti! Oǵan anasynyń altyndarynyń, qajeti de bolmaı qalypty.  Óıtkeni ol altynnan qymbat bilim alyp, ýaqytynda tamaqtanyp, durys demalyp, eń bilimdi de bilikti maman atanǵan edi..! 
Qurmetti balaqaılar? Sender she? Óz ómirlerińdi retteı aldyńdar ma?

Gúlmeken Qasenbaı

---