Qaıran da, qaıran, qaıran taý,
Tıýshi edi paıdań taý.
Paıdasynyń belgisi -
Úıimde turǵan úlgisi.
Úlgisiniń órnegi:
Shańyraǵym, ýyǵym,
Úıde baqan, syryǵym.
At ustaıtyn quryǵym,
Qazanyma qaqpaǵym,
Jeli bir qaǵar toqpaǵym,
Arbama arys biligim,
El qystaýǵa qonǵanda,
Sıyr bir jatar shiligim,
At júre almas araldym
İshińde buǵy, maraldym!
Buǵy da, maral jatqan jer,
Mergender tańdap atqan jer.
Merekege batqan jer,
Artyǵyn alyp satqan jer!
Úsh atamyz ótken taý,
Úsh myń qara bitken taý,
Ákem kúıeý bolǵan taý,
Sheshem kelin bolǵan taý.
Aq búrkenshek salynyp,
Ala beren kıgen taý,
It júgirtip, qus salyp,
Ózime teńdik tıgen taý!
Munarlanyp artymda
Qala berdiń kórinip.
İlgeri qaraı aıaǵym
Bir baspady-aý erinip!
Kóńil erip, jas kelip,
Ketti-aý óńim ózgerip!
Baı tóbetim mańqyldap,
Daýsy qudaı sańqyldap,
Baısal taýyp úrgen taý .
Balaly qazdaı baıpańdap,
Báıbishe dáýren súıgen taý.
Dýadaqtaı tońqańdap,
Toqaldar dáýren súrgen taý.
Keteıin dep ketpedim.
Tóńiregiń tolǵan jaý.
Shabyndy, qoǵa, qamysym,
Tamam jurtqa tanysym,
Myna da kórgen zorlyqtan
Qalady-aý esil qonysym!
Boranda malym shyqpaǵan,
Úıimdi daýyl jyqpaǵan.
Shaǵyr bir jýsan, ızendim,
Senen ketip kúızeldim.
Baılaýly atqa pishenim,
Mataýly atqa kisenim.
At arqandar qazyǵym,
Balalarǵa azyǵym!
Keteıin dep, ketpedim,
Oıda - orys, qyrda qazaqtan
Tynyshym bir ketti-aý jazyǵyń!
Qojyr, qojyr tastarym,
Sen esime túskende,
Kózimnen aqty-aý jastarym!
Ashynyń boıy aı tatyr,
Balaýsa shóbiń bal tatyr ,
Baldyrǵanyń maı tatyr.
Aqtyly qoı aıdattyr,
Alaly jylqy jýsattyr!
Shybyshym laq salmaǵan,
Toqtym bir qysyr qalmaǵan.
Úsh aı toqsan soqsa da
Malym jutap qalmaǵan,
Jelini syzdap mańyraǵan,
Tóli shýlap jamyraǵan.
On eki qazylyq, oı-Túndik,
Mańyrap jatkan qoı - Túndik!
Esil-Nura- eki sý -
Eńkeıip odan betiń jý.
Biriń - sheker, biriń - bal,
Qaıbirińdi aıtaıyn?!
Betege, káde, jaýylsha-
Shýlap turǵan báriń mal.
Keýir keldi-aý qıqýlap,
«Ash qulaqtan tynysh qulaq!» -
Kete berdim zar jylap,
Kóbeıgen soń kúnde shý.
Qarqaraly, Qazylyq,
Jatýshy ediń jazylyp!
Jazǵytury kóshkende,
Qalýshy ediń, qara jol,
Qabyrǵadan qazylyp.
Kúzgiturym qonǵanda,
Tórt túlik mal baýraıda,
Jatýshy edi jaı taýyp,
Qulashyn kerip jazylyp.
Egizimniń syńary
Birin soısam, toı bolǵan.
Qalǵan biri jetilip,
Keler jyly ózindeı
Yńyranyp semiz qoı bolǵan.
Soıǵanymnyń terisi
Ileı bilgen sheberge
Bir ózi bir boı bolǵan.
Ileı bilmes jamanǵa
El qydyryp ketkende,
Kek ala sholak ıtterge
Kókpary bolyp tartylyp,
Zor mereke toı bolǵan.
Biz bararmyz, bararmyz,
Baryp qaıda ońarmyz?!
Barsaq, zalal tartarmyz!
Sendeı jerdi jalǵanda,
İzdep qaıdan tabarmyz?!
Egin de jaıyn bilmesek,
Aryp, sharshap, talarmyz!
Tarynyń sógin jalarmyz,
Shópshek terip, shóp jıyp,
Ashtan ólip kalarmyz!

---