Dalanyń kúnge kúıip, aptap ótken ústinen
Bult shyqty qaptap kókten.
Qýandy sharýalar «ıa, Qudaılap!»,
Jerdi bir sýarar dep qýrap ketken.
Jaýar dep turdy halyq úmit etip,
Tambastan óte shyqty qur jeldetip.
Teńizge bardy da bult quıa saldy,
Dalaǵa qýrap turǵan jaýmaı ketip.
Teńizge pármeninshe quıa salyp,
Maqtandy myrzasynyp taýǵa baryp.
Taý aıtty: «Sen maqtanyp kelip tursyń,
Men turmyn bul isińe qaıran qalyp.
Eger de sol qadarly jaýsań jerge,
Sý berseń shóldep turǵan eginderge,
Kók shyǵyp, jer otaıyp, egin ósip,
Qandaı zor tıer edi paıdań elge!
Ne qaıyr qazir seniń jaýǵanyńnan,
Sensiz de sý jeterlik teńizderde!»

* * *
Jıylyp keńes tyndap otyrǵandar,
Ǵıbrat munan da bar alsańyzdar.
Bulttaı jerge jaýmaı, sýǵa jaýǵan
Qazaqta is etetin kóp adamdar.
Jumsamaı tıisti orynǵa mal, ónerin
Bireýler júredi, oǵan ne amal bar?!
Mysaly, qazaq - dala, orys - teńiz,
Dalany, shama kelse, kógertińiz.
Muń deseń, muqtaj deseń - qazaqta kóp,
Emes pe muny oılamaq mindetińiz?
Maqal bar: «Jaqsylyqty basyńa qyl,
Basyńnan assa, - degen, - dosqa isteńiz».
Men muny arnap jazdym zamandasqa,
Shash qoıǵan ózimmenen ǵamaldasqa.
Bul sózdi senderge aıtpaı, kimge aıtamyn,
Bolady asyl tasta, aqyl jasta.
Qaryshta óz jurtyńa, baryń bolsa,
ózge eldiń ózinde kóp bizden basqa.

---