Bir mergen bozsha qusty atyp aldy,
(Qoımady óltirip-aq jalǵyz jandy).
Basynda bir aǵashtyń úsh balasy
Shyryldap uıasynda jetim qaldy.
Ana joq tasıtuǵyn taǵam-jemdi,
Kún kórer bısharalar qaıtip endi?
Shýlaǵan balapandar daýsyn estip,
Sóz sóılep osylaısha Túlki keldi:
«Alda sorly, beıshara balalar-aı,
Jasynan ólgen eken analary-aı.
Kóbelek, shybyn aýlap kún kóretin
Joq eken paqyrlardyń shamalary-aı.
Áı, qustar! Tyńdańyzdar qulaq salyp,
Kezekpen jem tasyńdar ushyp baryp.
Úsheýin asyraýǵa qansha qıyn,
Etińder az kún qaıyr bólip-jaryp.
Kókek qus! Júniń túlep júr ǵoı beker,
Azyraq jetim úshin julsaq neter?
Qaıyrdyń bul dúnıede jetimge etken
Basqa is saýabyna bar ma jeter?!
Boztorǵaı! Qarap turma sen de tekke,
Júresiń beker shyrlap ushyp kókte.
Daladan, toǵaılardan tamaq izde,
Bulardyń úsheýine kóp kerek pe?!
Sarymoıyn! Er jetti ǵoı balalaryń,
Báleden Qudaı saqtar birer-jarym.
Bulardyń kúndiz-túni janynda bol,
Joqtatpaı sorlylardyń analaryn.
Qarlyǵash! Sen keltirseń masa-shybyn,
Bularǵa o da qorek bolar tyǵyn.
Osyndaı jurt jabylǵan saýap iske
Uıat qoı kirispeseń, jaryqtyǵym.
Sandýǵash! Ne qylaıyn seni qaırap,
Qoıarsyń oqtyn-oqtyn óziń saırap -
Kóńilin biraz ǵana kótermekke
Zarlynyń jetim qalǵan sory qaınap.
Dostarym! Osyndaı bir is etelik,
Jastardy jetim qalǵan kisi etelik.
İzgiler ormanda da bar ekenin
Osyndaı saýap ispen kórsetelik!»
Turǵanda Túlki sóılep saýap joldy,
Qaıǵyǵa estigenniń kóńili toldy.
Ashtyqqa shydaı almaı úsh balapan,
Aǵashtan tómen jerge túsip qondy.
Jurt jınap jaqsy keńes qylǵan Túlki,
Zarlanyp jetimdi aıap turǵan Túlki
Aýzyna úsheýin de qaǵyp saldy -
Ózi eken naǵyz Qudaı urǵan Túlki.

* * *
Jep qoıdy qustyń jetim balapanyn,
Qoryqpaı-aq obalynan Túlki zalym.
Qarasaq, el ishinde az ba adamdar
Jep júrgen obalsynbaı jetim malyn?
Pana bop, óziń saqta, Qudiretim,
Kim de kim balapandaı qalsa jetim.
Jumsaq til, kóńili qatty zalymdardyń
Ete kór jetimderden aýlaq betin!

---