Qartaıyp, Arystannyń áli ketti,
Aıbyńdy jurt qorqatyn sáni ketti.
Betine jan kelmeıtin ýaqyttar
Artyna bir qaramaı, bári ketti.
Aıaqta dármen qaldy júrerlik-aq,
Tym qarttyq jas emes qoı kórerlik-aq.
Tis túsip, tyrnaq muqap, qaırat ketip,
Jaıy bar tynysh jatyp ólerlik-aq.
Tynyshyna qoımady ony ózge ańdar,
Bata almaı, «seni me?» dep júrgen jandar.
Anaý da, mynaý da óshin alyp jatyr
Qashannan Arystanda kegi barlar.
At tepti, Qasqyr qapty etin úzip,
Birese jaralady Ógiz súzip.
Qınady árkim kelip bilgeninshe,
Arystan ún shyǵarmaı jatty tózip.
Yńyranyp jatyr edi óleıin dep,
Qasyna Esek keldi kóreıin dep.
Artyqsha janǵa batar jerin tańdap,
O da tur Arystandy tebeıin dep.
«Ia, Rabbym, - sol ýaqytta dedi Arystan,
Men túgil, úrkýshi edi At qamystan.
Bul Ógiz, mynaý Qasqyr tımek túgil,
Záresi ushýshy edi, kórse alystan.
Darıǵa, ol zamannyń bári ótti,
Kárilik degen bále kelip jetti.
Tis túsip, tyrnaq muqap, ál ketken soń,
Soryma bári munyń er bop ketti.
«Tóbem» dep kelip turǵan mynaý
Esek, Aıaqta jatýshy edi bolyp tósek.
Keshegi dáýren basta turǵan shaqta,
Muny kim etýshi edi jan dep esep.
Kóp shyǵar, joq demeımin, kinám meniń,
Rızamyn baq, báleńe birdeı seniń.
Tuıaǵyn sol jamannyń tıgizbeı al,
Qorlyqtan munan kórgen, jeńil ólim!»
Atalǵan birdeı emes osy ańdar,
İshinde jaqsy, jaman, osaly bar.
Arystan, Jylqy, Ógiz, Esekke uqsas,
Oılasaq, tabylmaı ma neshe adamdar?
Erler bar zamanynda dáýren súrgen,
Dushpanyn eregisken jalǵyz búrgen.
Qartaıǵan Arystandaı áli ketip,
Qarýy bul ýaqytta azyp júrgen.
Baq qonsa, syılar Alash aǵaıyn da,
Kele almas jaman batyp mańaıyńa.
Basyńnan baqyt qusy ushqan kúni
Qul-qútan basynady malaıyń da.

---