InfoHub Logo

Kásipkerler qajetti mamandardy jumysqa tartý úshin Qarǵandydaǵy kolejge oqý quraldaryn satyp áperip, aldyńǵy qatarly tehnıkalar zerthanasyn jabdyqtaýda.

Shaǵyn jáne orta bızneste baılanys salasynyń mamandary jetispeıdi. Kásipkerler kolejderdiń joǵary bilikti mamandardy daıarlap shyǵarýy úshin bilim ordalaryndaǵy zerthanalardy jabdyqtap, materıaldyq jaǵynan kómek qolyn sozýda.

«Kásipkerler ındýstrıaldy-tehnologıalyq koleji óz qamqorlyqtaryna alyp, qajetti qural-jabdyqtarmen qamtamasyz etýde.

Kolejde quramyna birneshe kásipker kiretin qamqorshylyq keńesi quryldy, kelisimshart aıasynda oqý prosesinde stýdentterge qajetti barlyq quraldarmen jabdyqtaýda», - dep habarlady óńirlik kásipkerler palatasynyń baspasóz qyzmeti.

Óńirlik kásipkerler kolejdiń zerthanasyn 4 mıllıon teńgege jabdyqtarmen qamtamasyz etti.

«Kolejde «Elektr baılanysy syzyqtyq qurylǵylaryn jáne symdy habar taratýdy eksplýatasıalaý» mamandyǵy boıynsha dýaldi oqytýdy engizý is-sharasyn júzege asyrý maqsatynda tórt fırmamen tórttarapty kelisimshart jasaldy. Kásipkerlerdiń arqasynda bilim oshaǵymyzdyń materıaldyq-tehnıkalyq bazasyn jańarttyq: zamanaýı tehnıkalarmen jabdyqtalǵan zerthana ashtyq», - dedi kolej dırektory Irına Kısıleva.

Qazir stýdentter oqýǵa arnalǵan barlyq qajetti quraldarmen jabdyqtaldy. Bul kómek olardyń oqýǵa degen yntasyn arttyrdy.

---