InfoHub Logo

Qaraǵandyda ótken pedagogtardyń tamyz keńesinde jas mamandarǵa qyzmettik baspana berý máselesi talqylandy, dep oblystyq bilim basqarmasynyń baspasóz qyzmeti habarlaıdy.

Basqarma basshysy Esenǵazy Imanǵalıevtiń sózine qaraǵanda, aýylǵa barǵan jas mamandarǵa baspana satyp alýy úshin nesıe berilip jatyr, biraq qalalarda bul másele sheshimin tabar emes. Oblys ákimi osy túıitkildi densaýlyq saqtaý basqarmasynyń tájirıbesi boıynsha sheshýdi, ıaǵnı bosap jatqan ǵımarattardy memlekettik organdarǵa tapsyryp, qalpyna keltirip, baspanaǵa qajettilik sezinip otyrǵan mamandarǵa berýdi usyndy.

«Búgingi tańda oqytýshyǵa óte joǵary talaptar qoıylyp jatyr. Biraq onyń tıimdi jumys isteýi úshin, aldymen soǵan saı jaǵdaı jasalýy tıis. Túıitkildi máselelerdiń biri baspanamen qamtý bolyp otyr. Sońǵy úsh jylda oblys mektepterine 1 814 jas maman jumysqa turdy, sonyń 884-i aýyl mektepterine barǵan. Osy kezeńde «Dıplommen - aýylǵa» baǵdarlamasy boıynsha 203 jas maman baspana nesıesin aldy. Al qalalardaǵy jaǵdaı qıyndaý. Baspana berilip jatqan joq», - deıdi Esenǵazy Imanǵalıev.

Ol osy máseleni sheshýdiń birneshe jolyn usyndy. Birinshisi - jergilikti atqarýshy organdary arqyly memlekettik turǵyn úı qorynan baspana bólip, ony bilim basqarmasyna bekitý. Ol keleside qala pedagogtary arasynda jekeshelendirý quqyǵynsyz bóliske salynady. Ekinshisi - bosap jatqan ǵımarattardy kúrdeli jóndep, qyzmettik baspanaǵa aınaldyrý.

«Árıne, baspananyń joǵy qıyn másele. Biraq biz ony birte-birte sheship kelemiz. Jyl basynda 568 oqytýshy jetispegen edi. Qazirgi kezde 90 adam jetispeı otyr. Aıtalyq, densaýlyq saqtaý júıesinde qyzmettik páterler berý arqyly aldaǵy eki jylda dárigerler jetispeýshiligi barynsha tómendetiledi. Tastandy ǵımarattardy jóndep, mamandarǵa berý arqyly bul másele sheshimin taýyp otyr. Osy tájirıbeni qoldanyńyzdar, ákimdermen birge jumys isteńizder», - deıdi Qaraǵandy oblysynyń ákimi Erlan Qoshanov.

Óńir basshysy qala jáne aýdan ákimderine qyzmettik baspana berý arqyly jas mamandardy tartý josparyn ázirleýdi tapsyrdy.

«Kadrlar tapshylyǵy máselesi sheshilýi tıis. Baspana bolsa, oqytýshy da bolady, men buǵan senimdimin», - deıdi Erlan Qoshanov.

---