InfoHub Logo

Bilimdi bolý degen sózdiń maǵynasy – belgisiz nárseni ashýǵa qabiletti bolý degen uǵym.

Ál-Farabı

Jer jahandy jaılaǵan pandemıa jaǵdaıy ómirdiń barlyq salalaryn synap qana qoımaı, jańa arnaǵa bet burýǵa ákelgeni barshamyzǵa aıan. Sol salalardyń qatarynda bilim berý júıesi erekshe atalady. Aıaqtan shalǵan kedergi, emi joq derttiń beleń alýyna qaramastan bilim berý, oqytý, tárbıeleý úderisteri esh tolastamaýyn maqsat etken elimizde 2019-2020 oqý jylynyń IV toqsany jańashyldyq pen ózgeristerge toly bolǵany belgili. Bul «ata-ana-mektep-muǵalim» úshtiginiń berik qalyptasýyna negiz bola otyryp, qashyqtan oqytý júıesine betburys jasaýdyń alǵashqy qadamdary edi. Sebebi, elimizdiń bilim berý júıesi tarıhynda jappaı qashyqtan oqytý bastamasy júzege asyrylmaǵandyǵyn eskersek, bul arnada qyzmet jasaý muǵalimderge artylǵan zor senimniń aıǵaǵy, dáleli bolmaq.

Aqparattyq tehnologıalar men tehnıkanyń damyǵan zamanynda qashyqtan oqytýdyń barlyq múmkindikterin paıdalaný aǵymdaǵy jyldyń bilim berý júıesinde erekshe mańyzǵa ıe boldy. Osy oraıda negizgi bilim berý arnalarynda túrli platformalar men baǵdarlamalardyń aıasy keńeıtilip, oqýshylardyń jaǵdaıyn jasaýǵa barynsha baǵyttaldy. Pánderge degen qyzyǵýshylyǵyn arttyra otyryp, taqyrypty tereńinen meńgertý, oqý maqsattaryna jetýdi qashyqtan júzege asyrý, oqýshy men muǵalim arasyndaǵy keri baılanys jasaýdy qoljetimdi etý maqsatynda Almaty qalasy №84 jalpy bilim beretin mektepte oqytýdyń jańa mejesi alyndy dep tolyǵymen aıta alamyn. Sebebi nátıjege baǵyttalǵan úderiske daıarlyq tyńǵylyqty júzege asyrylyp, ár oqýshynyń baılanys quraldarymen qamtamasyz etilýi eskerildi. Qashyqtan oqytýdyń tıimdi platformalary retinde Kundelik.kz, WhatsApp, Google classroom, Daryn.online, Bilimland platformalary tańdalyp, oqý-tárbıe úderisine tıimdi retinde tańdaldy. Túrksib aýdandyq bilim bóliminiń basshylyǵy tarapynan da oqý-ádistemelik kómek berilip, baǵyttaý jumystary joǵary deńgeıdegi sıpatyn aldy.

Jas maman – jas óskin. Qalaı baptalynsa, solaı jaıqalady. Aqparattyq tehnologıanyń bar múmkindigin paıdalanyp, oǵan jańashyl lep ústep kele jatqan №84 jalpy bilim beretin mekteptiń jas mamany, qazaq tili men ádebıeti pániniń muǵalimi, oqýshylarǵa baǵyt retinde qashyqtan oqytýdy arnadan qalyspaı júrgizip kele jatyrmyn. «Muǵalimdik mamandyq – bul adamtaný, adamnyń kúrdeli de qyzyqty, shym-shytyryǵy mol rýhanı jan dúnıesine úńile bilý. Pedagogıkalyq sheberlik pen pedagogıkalyq óner ol danalyqty júrekpen uǵa bilý bolyp tabylady» - dep uly pedagog V.Sýhomlınskıı aıtpaqshy, dál qazirgi jaǵdaıda qashyqtan bilim beretin muǵalim – nátıjege baǵyttalǵan is-áreketterdiń arnasyn júregimen sezip, shyn kóńilmen baǵalaı bilýshi. Mine, osy baǵytty tý etip, 5, 6-synyptardaǵy qazaq tili men ádebıeti pánderin oqytýda eki jaqty tıimdi baılanysty basshylyqqa alýdy betke ustap kelemin. Oqýshyǵa taqyryp jóninde aqparattyń qabyldanýyn, ony meńgerý jóninde keri baılanys jasaýyn, pánaralyq baılanystardy, oqý tapsyrmalarynyń jeńil túrlerin, telearnadaǵy vıdeo-sabaqtarmen ózektestirý syndy baǵyttar – qashyqtan oqytýdaǵy meniń ustanǵan pozısıam.

Túıindeı aıtar bolsam: qashyqtan oqytý–pedagogtyq is-árekette jańashyldyqqa bastaǵan, aıtarlyqtaı nátıjelerge bet burǵan bilim berýdiń aıryqsha túri. Osyndaı arnada óz biliktiligimdi shyńdaýym meniń muǵalimdik daǵdym men óremdi arttyrmasa, kemitpesi anyq.

Áıgerim Toqtarjanqyzy
№84 jalpy bilim beretin mekteptiń
qazaq tili men ádebıeti pániniń muǵalimi
Almaty qalasy

---