InfoHub Logo

Qarshadaı ǵana koreı qyzy qazaq tilin meńgergen. Endi ońtústikkoreıalyq PhD doktorant Kembrıdj ýnıversıtetinde Qazaqstan jaıly jáne qazaq tiline qatysty ǵylymı izdeniste júr.

Bul týraly 24 arna habarlaıdy.

Endjý Ký buǵan deıin stýdenttik almasý baǵdarlamasy boıynsha Qazaqstanda bilim alǵan. Eki jyldyń ishinde kóp qınalmastan qazaq tilin úırengen. Qazaq dostary úshin yńǵaıly bolsyn dep ol óz esimin İnjý dep ózgertip alǵan.

İnjýdiń Qazaqstanǵa degen qyzyǵýshylyǵy 12 jyl buryn paıda bolypty. 2005 jyly ol Almatydaǵy joǵary oqý oryndarynyń birine oqýǵa túsip, qazaq elimen tanysý múmkindigine ıe bolǵan eken. «Biraq qazir tildi umytyp baramyn», - deıdi ol.

"Iá, eki jylda. Biraq men qazir praktıka bolmaǵandyqtan jaı-jaı sóıleımin. Biraq sol kezde qazaqtardan qazaqsha jaqsy úırendim. Qazaq tilin úırený maǵan ońaı. Óıtkeni bizdiń gramatıkamyz uqsas turady", - deıdi İnjý.

«Qazaq tiliniń Qazaqstan eńbek naryǵyndaǵy ekonomıkalyq qundylyǵy» taqyrybynda doktorlyq dısertasıa jazý İnjýge ońaı bolmaı otyr. Óıtkeni Qazaqstan jaıly ǵylymı eńbekterdiń basym bóligi orys tilinde. Al orysshany ol túsinbeıdi.

İnjýdiń oıynsha, qazirde Qazaqstanda eńbek kúshine degen suranys pen usynysty qalyptastyrý salasynda qazaq tiline degen suranys artyp keledi eken.

"Meniń oıymsha, qazaq tiliniń baǵasy birte-birte joǵarylap bara jatyr. Óıtkeni memleket kómek beredi adamdarǵa kóp til úırenýge", - deıdi Kembrıdj ýnıversıtetiniń PhD doktoranty  Endjý Ký.

Sondaı-aq İnjý qazaqtyń ulttyq salt-dástúrlerin de jaqsy biledi. Joǵary oqý ornyndaǵy eshbir qoǵamdyq-mádenı is-shara onyń qatysýynsyz ótpeıdi. Kembrıdj ýnıversıtetiniń oqytýshylary bolsa Qazaqstannyń damý perspektıvasyna oń baǵa berip otyr.

---