InfoHub Logo

Qazaqstan álemdegi eń baqytty elder qatarynda 10 satyǵa joǵarylap, TMD elderi arasynda aldyńǵy orynǵa shyqty. Bul týraly BUU-nyń jańa «World Happiness Report» baıandamasynda aıtylǵan.

Bul týraly Infohub.kz aqparat agenttigi habarlaıdy.

Reıtıńtegi ornymyz

Bıyl Qazaqstan 147 eldiń ishinen 33-oryndy ıelendi. Ótken jyly bul kórsetkish 43-orynda bolǵan edi. Bul kórsetkish boıynsha Qazaqstan TMD elderi arasynda eń joǵary nátıjege qol jetkizdi. Odan keıingi oryndarda Ózbekstan (53-oryn), Qyrǵyzstan (66-oryn), Moldova (77-oryn), Reseı (79-oryn), Tájikstan (88-oryn), Armenıa (89-oryn) jáne Ázirbaıjan (102-oryn) ornalasty.

Álemdegi eń baqytty elder

Álemdegi eń baqytty el retinde qatarynan toǵyzynshy ret Fınlándıa tanyldy. Odan keıin Islandıa, Danıa, Kosta-Rıka jáne Shvesıa elderi tur. Alǵashqy ondyqqa Norvegıa, Nıderland, Izraıl, Lúksembýrg jáne Shveısarıa da kirdi. AQSH bolsa 23-oryndy ıelendi.

Eń nashar kórsetkishti, ótken jylǵydaı, Aýǵanstan kórsetti. Bul tizimge Serra-Leone, Malavı, Zımbabve, Botsvana, Iemen jáne Lıvan elderi de endi.

Reıtıń qalaı jasalady?

«World Happiness Report» jyl saıyn 20 naýryzda atalyp ótetin Halyqaralyq baqyt kúni qarsańynda jarıalanady. Baıandamany Oksford ýnıversıtetiniń zertteý ortalyǵy Gellap ınstıtýtymen jáne BUU-men birlesip daıyndaıdy. Ol halyqtyń ómir sapasyna qatysty saýalnamalarǵa negizdeledi.

Zertteýge 140 elden shamamen 100 myń adamnyń jaýaby alynǵan. Respondentterden ómirden alǵan qanaǵattanýshylyǵyn «Kantrıl baspaldaǵy» arqyly baǵalaý suralǵan (on satyly shkala, munda 10 – eń jaqsy ómir, 0 – eń nashar ómir).

Sonymen qatar, reıtıńti jasaýshylar jan basyna shaqqandaǵy JİÓ, erkindik deńgeıi, sybaılas jemqorlyqqa qatysty túsinikter jáne ómir súrýdiń kútiletin uzaqtyǵy sıaqty faktorlardy da eskeredi.