InfoHub Logo

Qoǵamdyq mańyzdy bastamalardy damytý qory «Qazaqstan muǵalimi 2020» ulttyq syılyǵyn tabystaıdy. Jeńimpaz $10 000 kólemindegi qarjylaı júldege ıe bolady, sonymen qatar fınalǵa qatysýshy 10 úzdik ustazdyń saýalnamasy Nobel syılyǵynyń pedagogtarǵa arnalǵan teńdessiz «Álem muǵalimi» jahandyq syılyǵynyń irikteý kezeńine jiberiledi.

2020 jyldan bastap «Úzdik pedagog 2019» respýblıkalyq jarysynyń qatysýshylarynan basqa, eńbek ótili úsh jyldan kem emes, bastapqy jáne orta bilim mekemeleriniń pedagogy «Qazaqstan muǵalimi 2020» ulttyq syılyǵyna úmitker ola alady.

Oǵan qatysý úshin www.teacherprize.kz resmı saıtynda saýalnama toltyrý qajet. Saýalnamalar 2020 jyldyń 1 mamyrynan 1 qyrkúıegine deıin qabyldanady.

«Saýalnamada baǵalanatyn negizgi krıterıılerdiń biri - pedagogtyń qoǵamdyq mańyzy bar áleýmettik isterge qatysýy. Qoǵamdyq jobalaý oqýshylardyń tulǵalyq qalyptasýynda úlken ról atqarady. Pedagogtyń áleýmettik jobalarda eńbektenýi balalardy biriktirýge, olardyń qarym-qatynasyn shyǵarmashylyqqa toltyrýǵa, balalardy paıdaly isterge qosýǵa jáne olardyń sana-sezimin tárbıeleýge múmkindik beredi. Úmitkerlerdi ádil irikteýdi táýelsiz qazylar akademıasy júrgizedi. Olardyń qataryna Bilim jáne ǵylym mınıstrliginiń, ata-analar qaýymdastyǵynyń ókilderi, bilim salasyndaǵy táýelsiz sarapshylar, pedagogıkanyń jetekshi mamandary, qoǵam qaıratkerleri, elimizdiń fılantroptary kiredi. Halyqaralyq aýdıtorlyq kompanıa irikteý úderisiniń aýdıti, baǵalaýy jáne testileýine qatysyp, iriktelgen úmitkerlerdiń bedeli men ómirbaıandaryna tereńdetilgen sholý júrgizedi. İrikteý Varke qorynyń (Varkey Foundation) ornatqan krıterıılerine sáıkes ótedi» delingen habarlamada.

«Qazaqstan muǵalimi 2019» ulttyq syılyǵynyń jeńimpazy qoǵamdyq mańyzdy bastamalardy damytý qorynyń $10 000 kólemindegi qarjylaı júldesin jáne «Jahandyq syılyqtyń Qazaqstandaǵy ambassadory» ataǵyn ıelenedi. Buǵan deıin bul júldeni Nur-Sultan qalasy daryndy jasóspirimderge arnalǵan «Bilim-ınnovasıa» lıseı-ınternatynyń matematıka páni muǵalimi Gúl Mýammer jeńip alǵan. Gúl Mýammer Jahandyq syılyq jeńimpazynyń esimi jarıalanatyn bilim jáne daǵdy búkilálemdik forýmyna (Global Education and Skills Forum) qatysady. Syılyq jaıly tolyq aqparatty 8 702 278 70 78 nómiri arqyly alýǵa bolady.

---