InfoHub Logo

25 mamyr kúni elimizdiń barlyq mektepterinde oqý jylynyń aıaqtalýyna oraı sońǵy qońyraý onlaın rejımde soǵylady. Bul týraly QR Bilim jáne ǵylym vıse-mınıstri Sholpan Karınova aıtty.

«Bilim salasynda osy apta mańyzdy ekendigin estere otyryp, toqsandyq baqylaýlardyń durys ótkizilýin qadaǵalaý qajet. 25 mamyrda sońǵy qońyraý merekesi mindetti túrde onlaın rejımde ótkiziletindigine nazar aýdartamyz. Al 3-4 maýsym kúnderi barlyq 11-synyp túlekterine atestat tapsyrý sharalaryn uıymdasqan jáne talaptardy saqtaı otyryp ótkizýdi usynamyz», — dedi Sholpan Karınova mınıstrliktiń Facebook-tegi paraqshasynda onlaın rejımde ótken apparat jınalysynda.

Osy rette QR Bilim jáne ǵylym mınıstrligi Asqat Aımaǵambetov joǵaryda atalǵan usynystar elimizdiń Densaýlyq saqtaý mınıstrligimen kelisilgendigin atap ótti.

«25 mamyrda onlaın rejıminde 1-10 synyptarǵa arnalǵan sońǵy qońyraý synyp sabaqtaryn ótkizemiz. Jyl qorytyndysyn sol jerde ár synyp boıynsha jasaýǵa, ony ártúrli ýaqytta ótkizýge bolady. Ony asyra uıymdastyrýdyń qajeti joq. Ár synyp jetekshisi qaı ýaqytta, qalaı ótkizetindigin eshqandaı esepsiz, suraýsyz jeke tártipte ótkizýi tıis», — dedi mınıstr.

Asqat Aımaǵambetov 3-4 maýsymda mektep túlekterine atestat tapsyrý sharasy kezinde sanıtarlyq talaptardyń qatań saqtalýy tıistigine erekshe nazar aýdartty.

---