InfoHub Logo

2025 jylǵy 3 tamyzda dúnıeden ozǵan ǵaryshker Talǵat Musabaevpen qoshtasý rásiminde sóz sóılegen Halyq qaharmany Toqtar Áýbákirov dosy, áriptesi týraly tebirenispen aıtty:

 «Qaı jerde júrsek te, qaı ǵarysh aılaǵynan ushsaq ta, qaıda ketsek te, biz árqashan óz kásibimizge, ǵaryshqa adal boldyq. Óıtkeni ǵarysh bizdi biriktirdi. Talǵat Amangeldiuly, sen Qazaqstan úshin kóp is tyndyrdyń. Sen naǵyz patrıot ediń. Muny men de, búkil halyq ta kórip, kýá boldy. Sen bárin taza júrekpen, adal nıetpen jasadyń. Eń mańyzdysy — sende árdaıym ózgelerde kezdespeıtin ıdeıalar boldy. Sol ıdeıalardy iske asyra aldyń. Saǵan sońǵy ret qosh aıtyp, otbasyńa, halqyńa myna nárseni jetkizgim keledi: Qazaqstan seni eshqashan umytpaıdy. Seniń atyń el tarıhynda máńgilikke jazyldy. Jatqan jeriń jaıly bolsyn, qymbatty dos!»

Ǵarysh áleminde qazaq eliniń atyn úsh márte tanytqan, ǵylym men el damýyna erekshe úles qosqan Talǵat Amangeldiuly Musabaev 74 jasynda ómirden ozdy. Ol — tek ǵaryshker emes, ulttyq maqtanysh, ǵylym men memleketke qaltqysyz qyzmet etken alyp tulǵa.

1951 jyly 7 qańtarda Almaty oblysy Jambyl aýdanyna qarasty Fabrıchnyı aýylynda dúnıege kelgen Musabaev eńbek jolyn avıasıa salasynda ınjener bolyp bastady. Keıin An-2, Tý-134 ushaqtarynyń ushqyshy, komandıri boldy. 1970–1980 jyldary komsomol, saıası-tárbıe jumystarynda da belsendilik tanytty.

1991 jyly Talǵat Musabaev ǵaryshkerlikke qabyldanyp, az ýaqyt ishinde úzdik synaqshy-ǵaryshker retinde tanyldy. Ol úsh márte ǵaryshqa ushyp, Jer orbıtasynda jalpy 341 táýlik ótkizdi. 1998 jylǵy «Mır» stansıasyndaǵy halyqaralyq mısıa kezinde «Znamá Mıra» týyn ǵaryshqa alyp shyǵyp, ony Nursultan Nazarbaevqa saltanatty túrde tabystady.

Ol Máskeý avıasıa ınstıtýtynda ǵylymı dárejelerin qorǵap, zymyran jáne ǵaryshtyq tehnıkalardyń senimdiligin zerttedi. 2007–2016 jyldary Qazaqstannyń Ulttyq ǵarysh agenttigin basqaryp, «KazSat» jobalary men ǵarysh ınfraqurylymyn damytýǵa eleýli úles qosty.

Musabaev — Reseı Federasıasynyń Batyry (1994), Qazaqstannyń Halyq Qaharmany (1995), avıasıa general-leıtenanty, sport sheberi, ǵylym doktory. El táýelsizdigi jolyndaǵy onyń erligi men eńbegi eshqashan umytylmaq emes.