InfoHub Logo

Búgin, 10 aqpanda, Qazaqstan Prezıdenti Qasym-Jomart Toqaevtyń tóraǵalyǵymen úkimettiń keńeıtilgen otyrysy ótedi. Bul – Oljas Bektenov basqaratyn mınıstrler kabınetiniń úshinshi otyrysy.

Bul týraly Infohub.kz aqparat agenttigi habarlaıdy.

Bektenovtiń premerligindegi úshinshi otyrys

Oljas Bektenovtiń premer-mınıstr qyzmetine taǵaıyndalǵanyna 6 aqpanda eki jyl toldy. Osy ýaqyt ishinde úkimettiń ekonomıkalyq saıasatynda ózgerister baıqaldy. Sarapshylardyń aıtýynsha, bul saıasat burynǵy jyldardaǵy búdjet tapshylyǵy sıaqty máselelerdi sheshýge baǵyttalǵan.

Saıasatker Ǵazız Ábishevtiń pikirinshe, úkimet shyǵyndardy qysqartyp, salyq jınaýdy jaqsartýǵa basa nazar aýdarady. Áleýmettik kómekter qajettilikke qaraı, naqty eseppen beriletin bolady. Bul jaǵdaıdy keıbir sarapshylar «techerlik dáýirmen» salystyrady, ıaǵnı búdjetti qatań únemdeý, salyqty kóbeıtý jáne tıimsiz shyǵyndardy qysqartý.

2024 jyl: Jańa úkimettiń alǵashqy otyrysy

2024 jyldyń 5 aqpanynda Prezıdenttiń sheshimimen búkil úkimet otstavkaǵa ketti. Kelesi kúni jańa quramdaǵy mınıstrler kabıneti jasaqtaldy. Al 7 aqpanda jańa úkimettiń alǵashqy keńeıtilgen otyrysy ótti.

Otyrysta Prezıdent jańa Salyq kodeksiniń jumysyna qatysty alańdaýshylyǵyn bildirdi. Sondaı-aq, bıznes pen ınvestorlardy belsendi tartý, ekonomıkany lıberaldandyrý, memlekettiń aralasýyn azaıtý jáne jekeshelendirýdi ashyq júrgizý qajettigin atap ótti.

Toqaev sondaı-aq, uıaly baılanys naryǵyndaǵy kemshilikterge, jylytý maýsymyndaǵy júıeli qatelikterge, joldardyń nashar jaǵdaıyna nazar aýdardy. Sıfrlyq tehnologıalardy, jasandy ıntellektti engizýdi, áleýmettik kómekti naqtylaýdy tapsyrdy.

2025 jyl: Ekonomıa, QQS jáne AES

2025 jylǵy otyrys 28 qańtarda ótti. Onda negizinen aldaǵy salyq reformasy men búdjetti únemdeý máseleleri talqylandy. Prezıdent «beldi býyp, qarajatqa saı ómir súrýge» ýaqyt kelgenin aıtty.

Vıse-premer Serik Jumanǵarın QQS esebinen tirkelý shegin 78 mıllıon teńgeden 15 mıllıon teńgege deıin tómendetýdi usyndy. Bul usynys QQS tóleıtin kásipkerler sanyn kóbeıtýge baǵyttaldy.

Memleket basshysy Qazaqstanǵa «salyqtyq qaıta júkteý» qajet ekenin rastady. Sondaı-aq, energıa tapshylyǵynyń ósýine baılanysty alǵashqy AES-ti tezirek salý jáne ıadrolyq klaster qurý jumystaryn bastaý kerektigin aıtty. Prezıdent ekinshi atom stansıasynyń ornyn izdeýdi tapsyrdy.

Buǵan qosa, Toqaev áleýmettik kómekti tek muqtaj jandarǵa ǵana kórsetý máselesin qaıta kóterdi.

Búgingi otyrysta ne qaralady?

Aqordanyń habarlaýynsha, búgingi keńeıtilgen otyrysta 2025 jylǵy eldiń áleýmettik-ekonomıkalyq damý qorytyndylary shyǵarylyp, aldaǵy kezeńge arnalǵan basty mindetter belgilenedi.

Úkimettiń baspasóz qyzmetiniń málimetinshe, otyrysta Premer-mınıstr Oljas Bektenov, Ulttyq bank tóraǵasy Tımýr Súleımenov, Inovasıalar jáne sıfrlyq damý mınıstri Jasulan Mádıev jáne birqatar óńir ákimderi baıandama jasaıdy.