InfoHub Logo

Qazaqstanda Memlekettik áleýmettik saqtandyrý qorynan (MÁSQ) tólenetin járdemaqylardyń mólsheri men berilý tártibi ózgeredi. Bul týraly Eńbek jáne halyqty áleýmettik qorǵaý mınıstri Asqarbek Ertaev málimdedi. Mınıstrdiń aıtýynsha, mundaı ózgeristerge qordy alaıaqtardan qorǵaý jáne zańsyz sqemalardy boldyrmaý maqsatynda qolǵa alynyp otyr.

Bul týraly Infohub.kz aqparat agenttigi habarlaıdy.

Járdemaqy tóleýdegi «sur» sqemalar

Mınıstrdiń aıtýynsha, keıbir azamattar jumystan shyqqannan keıin qysqa merzim ishinde járdemaqy alýǵa ótinish bildiredi. Mysaly, bir býhgalter bir mezgilde 10 kompanıada jumys istep, bárinen birdeı shyǵyp, jumyssyzdar qataryna qosylyp, qordan tólem talap etken. Mundaı jaǵdaılarda tólemder onyń sońǵy ortasha jalaqysy eseptelip berilýi tıis. Alaıda, bul júıeniń tıimdiligin arttyrý úshin tólemderdiń joǵarǵy shegi qaıta qarastyrylady.

Tólem merzimi qysqartylady

Buǵan deıin pandemıa kezinde jumyssyzdarǵa beriletin járdemaqy 6 aıǵa deıin sozylsa, endi bul merzim 4 aıǵa deıin qysqartylady. Mınıstr bul sheshimdi asyra silteý men zańsyz tólemderdiń aldyn alý úshin qajet dep sanaıdy. «Keıbir azamattar jumystan shyqqannan keıin birden járdemaqy alýǵa ótinish beredi. Bul durys emes. Biz bul júıeni retke keltiremiz», - dedi Ertaev.

1 mıllıon teńgege deıingi tólemder

Asqarbek Ertaev keıbir jaǵdaılarda jumyssyzdarǵa 1 mıllıon teńgege deıin tólem jasalǵanyn joqqa shyǵarmady. «Biz mundaı jaǵdaılardyń aldyn alamyz. Tólemderdiń joǵarǵy shegi belgilenedi. Barlyq zańdy tólemder azamattarǵa mindetti túrde beriledi», - dep qosty mınıstr.

Buǵan deıin Qazaqstandaǵy balalarǵa beriletin járdemaqylar men tólemder týraly jazylǵan bolatyn.