InfoHub Logo

Almaty qalasyndaǵy Shet tilder jáne iskerlik karera ýnıversıteti bas lısenzıasynan aıyryldy.

Buǵan deıin QR BǴM joǵary oqý orny bas lısenzıasynan aıyrý aldynda turǵany týraly habarlaǵan bolatyn. Qaıta tekserý qorytyndysy boıynsha tekserý paraǵynyń 46 tarmaǵynan 39 tarmaǵy boıynsha buzýshylyqtar anyqtaldy.

Ýnıversıtetke sáıkessizdikterdi joıýǵa ýaqyt berildi. Alaıda, joǵary oqý orny berilgen ýaqytty bilim berý qyzmetteriniń sapasyn jaqsartý úshin qajetti jumysty júrgizý máselesine emes, sot talqylaýyna jáne QR BǴM komıtetiniń is-áreketterine shaǵymdanýǵa jumsady.

Nátıjesinde Almaty qalasynyń Ákimshilik quqyq buzýshylyqtar jónindegi mamandandyrylǵan aýdanaralyq sotynyń sheshimimen joo bas lısenzıasynan aıyryldy.

Sondaı-aq Almaty qalasynyń Ákimshilik quqyq buzýshylyqtar jónindegi mamandandyrylǵan aýdanaralyq sotynyń 2021 jylǵy 18 tamyzdaǵy sheshimimen joǵary oqý oryny nusqamany oryndamaǵany úshin ákimshilik jaýapkershilikke tartyldy.

«Biz joǵary oqý oryndaryna buzýshylyqtardy joıýǵa ýaqyt beremiz, alaıda olar kemshiliktermen jumys júrgizbeıdi. Osyǵan baılanysty keıinirek qatań sharalar qoldanýǵa týra keledi. Ýnıversıtetterdiń oqý jaǵdaılaryn, bilim berý baǵdarlamalaryn jáne tutastaı alǵanda, stýdentterdi belgili bir mamandyqtarǵa oqytýǵa degen kózqarasyn jaqsartýy úshin bul óte mańyzdy. Áıtpese, joǵary oqý oryndary sapaly bilim emes, tek dıplomdar beretin bolady. Mysaly, Shet tilder jáne iskerlik karera ýnıversıtetinde bilim berý sapasyn qamtamasyz etýdiń ishki júıesi qalyptaspaǵan. Bilim berý baǵdarlamalaryn, jeke oqý josparlaryn taldaý belgili bir pánder boıynsha kredıtterdi ıgerýde úlken aıyrmashylyqtardy kórsetti. Tıisinshe, bilim alýshylar pánderdi tolyq kólemde meńgermeıdi. Oqytý nátıjeleri boıynsha stýdentterdiń 90%-y shekti deńgeıden óte almady», – dep atap ótti QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.

Zańnamaǵa sáıkes, lısenzıadan aıyrylǵan jaǵdaıda bilim alýshylar semestrdiń aıaqtalýyn kútpeı-aq basqa ýnıversıtetterge aýysa alady. Stýdentter men ata-analardy jáne jumys berýshilerdi joǵary oqý oryndary kórsetetin bilim berý qyzmetteriniń sapasyna nazar aýdarýǵa shaqyramyz.

---