InfoHub Logo

Qazaqstannyń Atom energıasy agenttiginiń basshysy Almasadam Sáttiqalıev pen Reseıdiń «Rosatom» memlekettik korporasıasynyń bas dırektory Alekseı Lıhachev Máskeýde kezdesti. Kezdesýde eki eldiń atom salasyndaǵy ózara is-qımylynyń keń aýqymy, sonyń ishinde Qazaqstandaǵy Balqash AES qurylysy jobasyn iske asyrý máseleleri qaraldy.

Bul týraly Infohub.kz aqparat agenttigi habarlaıdy.

AES qurylysyna qazaqstandyq kompanıalardy tartý

Kezdesýde atom salasy úshin kadr daıarlaý, ǵylymı-tehnıkalyq yntymaqtastyqty damytý, sondaı-aq óndiristi jersindirý jáne qazaqstandyq kásiporyndardyń atom jobalaryn júzege asyrýǵa qatysýy máselelerine erekshe nazar aýdaryldy.

«Biz osy stansıany salý kezinde jersindirý jáne qazaqstandyq kompanıalardy tartý máselelerin, kadr daıarlaýdy, sondaı-aq elderimiz arasyndaǵy qarym-qatynastyń strategıalyq sıpatyna tolyq sáıkes keletin bazalyq tásilderdi ázirleýdi talqyladyq. Barlyq pozısıalar boıynsha ortaq túsinistikke qol jetkizgenimiz qýantady», - dedi Almasadam Sáttiqalıev.

Jobany iske asyrýdyń mańyzdylyǵy

«Rosatom» bas dırektory Balqash AES jobasyn keshendi daıyndaýdyń mańyzdylyǵyn atap ótti. Onyń ishinde alańdy ınjenerlik jáne tabıǵı-klımattyq zertteýler júrgizý qajettiligin aıtty.

«Bizge alańdy baqylaý úshin kem degende bir jyl qajet. Osydan keıin barlyq qajetti esepterdi qalyptastyryp, jobany naqty jerdiń tabıǵı, geologıalyq jáne aýa raıy jaǵdaılaryna sáıkes júzege asyramyz», - dedi Alekseı Lıhachev.

Onyń aıtýynsha, Balqash AES jobasy reseılik atom energetıkasy tehnologıalaryna negizdelip, alańnyń jergilikti erekshelikteri eskerile otyryp ázirlenetin bolady.

Taraptar beıbit maqsattaǵy atom energıasi salasynda konstrýktıvti dıalogty jalǵastyrýǵa jáne yntymaqtastyqty odan ári damytýǵa degen qyzyǵýshylyqtaryn rastady.