InfoHub Logo

Tula boıy tarıhqa tunǵan elimizdegi eń úzdik joǵary oqý oryndarynyń biri ári biregeıi ál-Farabı atyndaǵy Qazaq Ulttyq ýnıversıteti búginde aldyńǵy qatarly oqý orny bolyp tabylady. Qazaq halqynyń baǵyna qurylyp, boı kótergen altyn uıamyz 1934 jyldyń 15 qańtarynan bastap óz qyzmetin resmı túrde bastaǵan. Qazirgi kezde ál-Farabı atyndaǵy Qazaq Ulttyq ýnıversıteti elimizdiń jetekshi klasıkalyq ýnıversıteti mártebesine ıe bolyp otyr. Búgingi kúni elimizdegi bilim men ǵylymnyń iri ortalyǵyna aınalyp, ýnıversıtet ınovasıalyq damýdyń kóshbasshysyna aınaldy. Otanymyzdaǵy bilikti mamandar daıalaýǵa zor úles qosyp kele jatqan irgeli ǵylym ordasy. 

Elbasynyń joldaýynda aıtylǵandaı «Biz ýnıversıtettik bilim men ǵylymdy damytýdy jańa deńgeımen qamtamasyz etýge mindettimiz» degen bolatyn. Ýnıversıtetimiz jan-jaqty baǵytta bilim berý baǵdarlamalary boıynsha tabysty ótken ýnıversıtet. Ýnıversıtette kópsalaly joǵary kásibı bilim júıesi boıynsha kóptegen stýdentter bilim alýda. Qazaq Ulttyq ýnıversıtet qalashyǵynda bilim alyp jatqan stýdentterge barlyq jaǵdaı jasalǵan. Iaǵnı, ýnıversıtetimizde oqyp jatqan stýdentter tek bilim nárimen sýsyndap qana qoımaıdy. Máselen, ınternet ortalyǵy,  Ó.A. Joldasbekov atyndaǵy stýdentter saraıy, tamaqtandyrý kombınaty, stýdentterge qyzmet kórsetý ortalyǵy «Keremet», kompúterli-tehnıkalyq jabdyqtar, WI-FI symsyz ınternet jelisi, oqý bazasymen qamtylǵan zamanaýı baspa-polıgrafıalyq keshen, aýqymy keń sporttyq keshen, Dmıtrıı Balandın atyndaǵy 25 metrlik júzý baseıni sıaqty ortalyqtar ornalasqan. Onymen qosa eń baı kitaphana –  ál-Farabı atyndaǵy kitaphana ornalasqan. Kitaphana óz kezeginde qoınaýynda 2 mıllıonnan astam kitap qory bar záýlim mekemede kez-kelgen stýdent ózine qajetti málimetterge esh qıyndyqsyz qol jetkize alady. Ýnıversıtet óziniń jan-jaqty qyzmetin keń aýqymda júrgizip, qarqyndy damyp, jastardyń boıynda azamattyq, ultjandylyq sezimderin, urpaqtar sabaqtastyq dástúrli úrdisin qalyptastyrýda zor eńbek etýde.

Taǵy da bir mańyzdy qaralatyn máseleler qataryna álemniń 700 úzdik ýnıversıtetiniń arasynda júrgiziletin Quacquarelli Symonds agenttiginiń reıtıńisine Qazaqstan JOO kóshbasshysy QazUÝ birinshi ret 2009 jyly qatysyp, sol kezdiń ózinde-aq 60-650 shepten oryn alǵan bolatyn. Sol bastama ýnıversıtetke serpilis berip, joǵary talaptar qoıdy. QazUÝ bir jyl ishinde top-ýnıversıtetterdiń 40-450 satysyna kóterildi. Bul rette QazUÝ álemdik úzdik ýnıversıtetterdiń ortańǵy bóligine jaqyndaǵan Ortalyq Azıadaǵy tuńǵysh ýnıversıtet bolyp sanalady.

Ýnıversıtetimizdiń negizgi maqsaty – joǵarǵy bilikti mamandardy daıarlaýǵa, álemdik bilim keńistiginde ıntegrasıalaýǵa, óndiriske engiziletin irgeli jáne qoldanbaly zertteýlerdi damytýǵa baǵyttalǵan keń kólemdegi rýhanı-tárbıelik máni zor bilim men ǵylym nárimen sýsyndatý. Ál-Farabı atyndaǵy Qazaq ulttyq ýnıversıtetinde búginde bilikti mamandar daıarlaıtyn fakúltetterde bedeldi ǵylymı zerthanalar men mektepter shoǵyrlanǵan. Sonyń ishinde janyma jaqyn, qazirgi tańda ózim bilim alyp jatqan tarıh, arheologıa jáne etnologıa fakúlteti.

Ál-Farabı atyndaǵy Qazaq ulttyq ýnıversıtetiniń tarıh fakúlteti – otandyq jáne shetel tarıhy, arheologıa, etnologıa, mýzeı isi men eskertkishterdi qorǵaý, muraǵattaný salasynda joǵary dárejeli maman daıyndaý isinde elimizdegi kónekóz, eń myqty, bári moıyndaǵan ortalyq bolyp tabylady. Qazaqstannyń kóptegen ǵylymı, saıası, qoǵamdyq jáne isker elıtasy tarıh fakúltetiniń túlekteri.

Tarıh fakúlteti respýblıkada alǵashqylardyń biri bolyp Phd doktorantýrada tarıh, dúnıe júzi tarıhy baǵyttary boıynsha mamandar daıyndaı bastaǵan.

Qazaq Ulttyq ýnıversıteti adamnyń tulǵa bolyp qalyptasýyna yqpal etip, tulǵanyń jan-jaqty qabiletin ashyp kórsetýine múmkindik beretin meken. Sol sebepti de, QazUÝ stýdenti bolý ómirdiń úlken sáttilikteriniń biri dep sanaımyn.

Qazaq ulttyq ýnıversıtetinde oqyp júrgen jastardyń qazir de, bolashaqta da jetistikterge jetý jolyndaǵy múmkindikteri óte zor. Sonymen qatar, ál-Farabı atyndaǵy Qazaq Ulttyq Ýnıversıteti – adamgershiliktiń dáni egilgen, jastyq shaqtyń esten ketpes, máńgilik mekeni bolyp qalmaq.
t.ǵ.k., dosent Hasanaeva L.M. 1-kýrs magıstranty Daırova G.Q.

---