InfoHub Logo

Ál-Farabı atyndaǵy Qazaq ulttyq ýnıversıteti bizdiń elimizde joǵary bilim berý júıesiniń tanymal flagmany bolyp tabylady.

Ýnıversıtet óziniń joǵary bilim sapasymen áıgili, halyqaralyq deńgeıde moıyndalǵan, álemniń úzdik ýnıversıtetteriniń qataryna kiredi. Ýnıversıtet ishinde belsendi ǵylymı-zertteý jumystary júrgiziledi, eń myqty profesorlyq-oqytýshylyq quram bar – bul ony elimizdegi eń myqty JOO etedi.

Ýnıversıtet Qazaqstan úshin biregeı kampýsqa ıe, onyń aýmaǵynda qazirgi zamanǵy sport keshenderi, korpýstar, stýdentter saraıy, murajaı, jaıly jataqhanalar jáne Ortalyq Azıadaǵy eń úlken ǵylymı kitaphana bar. Ýnıversıtette eki dıplomdy bilim berý baǵdarlamalary qarastyrylǵan. Bul baǵdarlamany alǵash ret dál osy ál-Farabı atyndaǵy QazUÝ qoldana bastady.

Ýnıversıtet bedeliniń joǵary bolýy shetel stýdentterin kóptep tartady. QazUÝ-ǵa Reseı, Qyrǵyzstan, Ózbekstan, Mońǵolıa, Qytaı, Úndistan, AQSH, GFR, Túrkıa, Ońtústik Koreıa, Japonıa, Ulybrıtanıa jáne basqa da kóptegen elderden bilim alýǵa keledi. Kóptegen sheteldik stýdentter tehnıkalyq, ekonomıkalyq jáne tabıǵı baǵyttaǵy mamandyqtardy tańdaıdy.

Qazaqstan Respýblıkasynyń aldyńǵy qatarly JOO – Ál-Farabı atyndaǵy Qazaq ulttyq ýnıversıtetiniń qabyrǵalary 1934 jyly qalanǵan. Búgingi tańda bizdiń ýnıversıtette 25 000-nan astam stýdent oqıdy. On alty fakúltetten turatyn ýnıversıtette shamamen úsh myń profesorlyq-oqytýshylyq quram stýdentterdi bilim nárimen sýsyndatady.

QazUÝ qalashyǵy dep atalatyn jerde stýdentterdi oqytý úshin barlyq jaǵdaı jasalǵan. Ó.Joldasbekov atyndaǵy 1600 oryndyq stýdentter saraıy, TMD-daǵy jalǵyz aýqymdy «Ál-Farabı» kitaphanasy, sport kesheni men stadıon, jańa qurylystar, áskerı kafedra, tehnopark, baseın, sýpermarket, stýdenttik kafe, stýdentke arnalǵan stýdentter úıi, medısınalyq ortalyq jáne stýdentterge qyzmet kórsetý ortalyǵy stýdentterdiń ıgiligine jumys isteıdi. KazUÝ aýmaǵynda telefondy ońaı qýattaýǵa bolady.

Stýdentter saraıynda daryndy stýdentterge arnalǵan stýdenttik klýb jumys isteıdi. Stýdenttik klýbtyń talantty músheleri kóptegen konkýrstardyń jeńimpazdary atanǵan. Solardyń biri retinde «Baqyt» bı ansamblin atap ótýge bolady.

Ýnıversıtette dástúrli túrde talantty stýdentterdi anyqtaýǵa arnalǵan «SuperFreshman», «Stýdenttik kóktem», «Ana tili arýy-Jigit sultany» konkýrstary ótkiziledi.

Sondaı-aq stýdentterdiń kóshbasshylyq, uıymdastyrýshylyq qasıetterin damytý maqsatynda jastar uıymdarynyń komıteti jumys isteıdi. Onyń quramyna stýdentterdiń quqyǵyn qorǵaıtyn «Suńqar» stýdentter kásipodaǵy, Stýdenttik Senat, «Kómek» eriktiler uıymy, stýdenttik keńes, Bolon prosesi jónindegi stýdenttik búro, stýdenttik ǵylymı qoǵam kiredi. Qazirgi ýaqytta ýnıversıtettegi barlyq merekelik is-sharalar tikeleı atalǵan jastardyń qatysýymen ótedi. Aıta ketý kerek, bul jastar dástúrge aınalǵan IV Halyqaralyq stýdenttik forýmdy sátti uıymdastyrdy.

Ǵylymmen aınalysqysy keletin stýdentter úshin dástúrli túrde «Ǵylym álemi», «Farabı álemi» sıaqty konferensıalar, forýmdar uıymdastyrylady. Inovasıalyq jobalarǵa qyzyǵýshylyq tanytqan, ýaqyt aǵymynan qalmaýǵa umtylǵan stýdentter úshin ár fakúltette bıznes-ınkýbatorlar, ýnıversıtette tehnopark jumys isteıdi.

QazUÝ-dyń álemdik arenada joǵary deńgeıde tanylýy onyń ınovasıalyq jobalarymen baılanysty, olardyń ishindegi eń mańyzdysy – «Ýnıversıtet 4.0» modelin engizý. Onyń irgetasy ınovasıalyq-tehnologıalyq jáne rýhanı-adamgershilik platformalardyń sımbıozy negizinde AL-FARABI university SMART CITY qurylysynyń tujyrymdamasy bolyp tabylady.

AL-FARABI university SMART CITY modeli Ábý Nasyr ıbn ál-Farabıdiń izgilikti qoǵam týraly ıdeıalary men ilimderi negizinde ázirlengen. Ony engizý zamanaýı bilim berý ýnıversıtetin qurýǵa baǵyttalǵan, onda eki negizgi komponent bir ýaqytta jáne úılesimdi damıdy – qyzmettiń tehnologıalyq jáne rýhanı-adamgershilik aspektileri.

Ýnıversıtettiń tehnologıalyq platformasy Ekampýs jobasyna negizdelgen:

QazUÝ – bultty tehnologıalar JOO qyzmetin avtomattandyrýǵa engizilgen sandyq ýnıversıtet;

Smart-tehnologıalar kampýs ınfraqurylymyn basqarýǵa engizilgen;

Big Data tehnologıalary analıtıkalyq júıeni qalyptastyrý úshin qoldanylady.

İri ınovasıalyq korporasıalardyń tájirıbesin taratý maqsatynda ýnıversıtette Hewlett-Packard, Cisco, Kopisa Minolta, Fujitsu, Samsung, Alcatel ǵylymı-bilim berý ortalyqtary, Kasperskıı zerthanasy, Microsoft, Intel, Huawei qurylyp, belsendi jumys isteýde.

E-kampýs ınfraqurylymynyń mańyzdy elementi QazUÝ-dyń ekologıa, munaı-gaz jáne ýran ónerkásibi, bıoınformatıka, nanotehnologıa, seısmıkalyq jáne geologıalyq barlaý, ǵaryshtyq tehnologıalar, ekonomıkalyq jáne áleýmettik boljaý problemalary boıynsha qoldanbaly mindetterdi sheshý úshin paıdalanylatyn derekterdi saqtaýdyń korporatıvtik júıesin jáne ónimdiligi joǵary esepteý resýrstaryn biriktiretin esepteý qýaty 5 teraflops bolatyn ınovasıalyq data ortalyǵy bolyp tabylady.

Ál-Farabı atyndaǵy Qazaq ulttyq ýnıversıteti – bul baı dástúri, kóp jyldyq oqý jáne ǵylymı jumys tájirıbesi bar joǵary oqý orny.

Ál-Farabı atyndaǵy Qazaq ulttyq ýnıversıteti – memlekettik atestattaýdan birinshi bolyp ótken jáne barlyq mamandyqtar men deńgeıler boıynsha bilim berý qyzmetin júzege asyrý quqyǵyn rastaǵan Qazaqstan Respýblıkasynyń Joǵary bilim berý júıesiniń jetekshi mekemesi.

Ál-Farabı atyndaǵy QazUÝ – Qazaqstan joǵary oqý oryndarynyń Bas reıtıńisiniń kóshbasshysy, el tarıhynda tuńǵysh ret «sapa salasyndaǵy jetistikteri úshin» Qazaqstan Respýblıkasy Tuńǵysh Prezıdenti syılyǵynyń laýreaty, ónim jáne qyzmet kórsetý sapasy salasyndaǵy jetistikteri úshin Táýelsiz Memleketter Dostastyǵy syılyǵynyń dıplomanty. Ýnıversıtet joǵary bilikti mamandardy daıarlaýǵa, álemdik bilim berý keńistigine odan ári yqpaldasýǵa, irgeli jáne qoldanbaly zertteýlerdi damytýǵa, olardy óndiriske engizýge baǵyttalǵan orasan zor bilim berý, ǵylymı, rýhanı-tárbıelik, ınovasıalyq jáne óndiristik áleýetke ıe.

Búgingi tańda ál-Farabı atyndaǵy QazUÝ bizge mamandyqtardyń keń tańdaýyn usynatyn tutas oqý-ǵylymı keshen bolyp tabylady.

Ýnıversıtet álemniń 500 jetekshi joǵary oqý ornymen yntymaqtasa otyryp, bilim berý qyzmetine álemge áıgili úzdik sheteldik ǵalymdardy tartady. Sonymen qatar, akademıalyq utqyrlyq, qos dıplomdar, Erasmus+, Fulbright, DAAD, Mevlana, Bolashaq halyqaralyq baǵdarlamalary jas ǵalymdarǵa álemniń ozyq elderindegi tájirıbeni ıgerýge múmkindik beredi. Aýqymdy ǵylymı jobalar 8 ǵylymı-zertteý ınstıtýttary men 29 ǵylymı ortalyqtarda júzege asyrylýda.

QazUÝ – óz esebinen postdoktorantýra baǵdarlamasyn ashqan alǵashqy ulttyq ýnıversıtet. 2020 jyly ýnıversıtette basym ǵylymı baǵyttar boıynsha 35 postdoktorant jumys istedi:

- IT jáne jasandy ıntellekt,

- nano-tehnologıalar,

- plazma fızıkasy,

- astrofızıka,

- matematıka,

- ekologıa,

- bıotehnologıa,

- sý resýrstary,

- psıhofızıologıa,

- saıasattaný jáne t.b. postdoktorantýra baǵdarlamasy óziniń tıimdiligin dáleldedi.

Baǵdarlamany iske asyrý kezeńinde postdoktoranttar 160-tan astam maqala jarıalady, olardyń 70%-y Q1, Q2 jýrnaldarynda jarıalandy, keıbir ǵylymı salalarda postdoktoranttardyń ónimdiligi qazaqstandyq ǵalymdardyń osyndaı ortasha kórsetkishinen 10 ese asyp tústi.

Ýnıversıtet bazasynda jas ǵalymdardyń ǵylymı-zertteý jumystaryn júrgizýge jáne nátıjelerin óndiriske engizýge úlken múmkindikter qarastyrylǵan. Ǵylymı-zertteý jumystaryn granttyq qarjylandyrýdyń jalpy kóleminiń 10%-dan astamy bilim alýshylardy zertteýlerge aqyly negizde tartýǵa bólinedi. Bul maqsatqa sońǵy 5 jylda 2 mlrd teńgege jýyq qarjy bólindi. Bul bilim alýshylardyń ǵylymı áleýetin damytýǵa, ǵylymı kadrlardy daıarlaýǵa jáne ǵylymı mektepterdiń sabaqtastyǵyn qamtamasyz etýge aıtarlyqtaı úles qosady.

QazUÝ – álemniń reıtıńtik basylymdarynda jarıalanǵan ǵylymı jarıalanymdar sany boıynsha Qazaqstannyń joǵary oqý oryndary arasynda kóshbasshy, jyl saıyn Scopus jýrnaldarynda 1000-nan astam maqala jarıalaıtyn alǵashqy ýnıversıtet bolyp tabylady.

 Memleketimizdiń prezıdenti Qasym-Jomart Toqaev: «Jastar – qashanda tyń ıdeıalardyń qaınar kózi, oń ózgeristerdiń qozǵaýshy kúshi. Sondyqtan óskeleń urpaqtyń osyndaı áleýetin durys arnaǵa baǵyttap, tıimdi paıdalanýymyz kerek» degen bolatyn. Bizdiń basty maqsatymyz da osy. Jas urpaqqa sapaly bilim berýde qara shańyraq – ál-Farabı atyndaǵy Qazaq ulttyq ýnıversıtetiniń de úlesi zor. QazUÝ – daryndy jastardy birigetin oryn. Qurmet pen shynaıy dostyqtyń mekeni. QazUÝ – júrekterdi biriktiredi. QazUÝ – tulǵanyń qalyptasýyna yqpal etetin, tulǵanyń jan-jaqty qabiletterin ashatyn oryn. Sondyqtan meniń QazUÝ-da bilim alýym – meniń ómirimdegi eń úlken jetistigim dep sanaımyn.

Ábitaı B. Ál-Farabı atyndaǵy Qazaq ulttyq ýnıversıteti, «Bıznes-tehnologıalar» kafedrasynyń 5V090900 –«Logıstıka (salalar boıynsha)»mamandyǵy boıynsha 4 kýrs stýdenti

Sharapıeva M.D. Ál-Farabı atyndaǵy Qazaq ulttyq ýnıversıteti,  «Bıznes-tehnologıalar» kafedrasynyń aǵa oqytýshysy

Musa Q.A. Ál-Farabı atyndaǵy Qazaq ulttyq ýnıversıteti, «Bıznes-tehnologıalar» kafedrasynyń oqytýshysy

---