Arqar menen quljadaı
Qoıyndasqan ejelden.
Eki tentek teteles
Soıyldasqan eki elden.
Tún zamandy tóńkergen
Topan-zaman ne kúted?
Qyrǵyz - taýdyń tarpańy,
Qazaq - qyrdyń qulany.
Ekeýińe topannyń
Tartqan mynaý urany:
Eki tarlan tabysyp,
Shurqyrasqaı dep kúted.
Alataý, Arqa kúńirengen
Kúni keshe zaryńnan.
Senderdi solaı sorlatqan
Albastydan arylǵan.
Búgingi tuńǵysh toıyńa
Toı ulasqaı dep kúted.
Endi aldym ashyq dep,
İlgeri basqaı dep kúted.
Elmen qatar eldikten
Úmitti bolǵaı dep kúted.
Uıymdaryń sol jolda
Uıytqy bolǵaı dep kúted.
Soqqy jegen jetim el
Balaýly bolǵaı dep kúted.
Sondyqtan qyzyl jalyndaı
Jalaýly bolǵaı dep kúted.

---