Qyryqta dáneńe joq dara turǵan,
Baıaǵy bala minez, bala tulǵam.
Dál osylaı on alty jasymda men,
Basymnan tún ótkerip, tań atyrǵam.
Baıaǵydaı minezim, aqylym da,
Ketkenim joq áli uzap shaqyrymǵa.
Mytyp qalsam ókshemdi atyrylǵan,
Jıren taı joq jalǵyz-aq taqymymda.
Baıaǵydaı kúnderim túnge ulasqan,
Túndi súıem...
Súıýshi em túndi jastan.
Ómir degen mektepti bitire almaı,
Kóshe almaı-aq kelemin bir klastan.
Baıaǵydaı shyt-shybyr jeıdelerim,
Baıaǵydaı kúlgenim, sóılegenim.
Baıaǵydaı urttap ap ystyq astan,
Aýzym kúıip qalady keıde meniń.
Baıaǵydaı...
Bári de baıaǵydaı.
Baıaǵydaı kilemin jaıady maı.
Endi maǵan qyryqtyń qylyǵyn ber,
Aqylyn ber, aryn ber, aıa, qudaı!..

---