InfoHub Logo

Naıman eliniń bir atasy — qyzaı el-jurtyna ókpelep, jalaıyr ishine kóship kepti. Onyń sebebi alaman asyr toı ústinde kókpar tartyp júrgen jigitterdiń biri mert ketip, onyń ólimine qyzaı adamdary jalaly bolyp qalypty. Qasqaıyp kep ádeıi qastandyq jasamaǵandyqtan, olar qun tóleýden bas tartyp, sadyrlardyń bitpes daýyna ushyrapty. Qyzaılar sóıtse de, teńdik bermeı, údere kóshse kerek.

«Jasyrynǵan jerleriń jalaıyr ǵoı, olardyń da saǵyn syndyrarmyz» dep tistengen sadyrlar bir úlken adamnyń asyna jalaıyrlardy ábden keshtetip shaqyrypty. Jalaıyrlar at jaratyp, balýan iriktep úlgermegen eken, Eskeldi sonda da nartáýekelmen aza salyp, tartyp ketipti. Atqosshysy tepse temir úzerlikteı, jap-jas Qarabek degen batyr eken, Esekeń:

— Osy seniń atyń qalaı edi? — depti.

— Kim bilsin, áıteýir, ıt qospaı-aq qasqyr, qarsaqty soǵyp alyp júrmin ǵoı, — deıdi Qarabek.

Esekeń atty eki aınalyp ótip, «Qos báıgege!» deıdi. Sonymen at báıgege ketedi.

Sodan kúres bastalyp, palýan izdelinedi. Eliniń aty atalyp jatqan soń, Esekeń Qarabekke qarap:

— Qara kúshke qalaı ediń? — deıdi.

— Qalaı deıin, nasybaı ýqalaǵanda qaraǵash, qaıyńdardy burap, shyrynyn tamyzyp júrmin ǵoı, — dedi Qarabek.

— Kúres! — deıdi Esekeń.

Aqyrynda báıgeden Qarabektiń jıren qasqasy kelip, qara nar, qaly kilemdi ıemdenedi. Ózi alysqan adamynyń atan jiligin úzip, bas báıgeni — toǵyzdy alady.

— Bul senderdiń atalaryńnyń árýaqtary jebegen soń kelgen jeńistik, — dep, Esekeń eki báıgeniń de shypshyrǵasyn shy- ǵarmastan qyzaı baýyrlaryna ákep beripti.

---