InfoHub Logo

Besekbaı bastaǵan bir top adam Táshken qalasyna kire salýǵa shyqqanda jol tosqan qaraqshylar olardyń barlyq kólikterin aldaryna salyp, qýyp ketedi. Bulardyń qolynda tek bir soltaq atan ǵana qalady. Otyz adamnyń arasynda jarymjan bir túıe. Endi ne isteý kerek? Laj joq bári túıege selbesip aýyldaryna qaıtady. Aýyl qashyqta, uzaq jol azabyn shegýshiler álgi soltaq atanǵa kezektesip minip, aıaq sýytpaqshy bolady.

Olardyń arasynda Qonys degen etsheń, semiz qarıasy bar eken. Ol túıege mingen bette túspeı qoıady. Bir kún, eki kún ótedi. Basqalar tyqyrshı bastaıdy. Únemi jaıaý júrgendikten keıbireýleriniń aıaqtary talady. Qonysqa «biz de bir mezgil aıaq sýytaıyq ta» dep aıtaıyq dese, bata almaıdy. Sodan soń olar Besekbaıǵa kelip:

— Ana Qonysekeńe aıtsańyzshy, bizdiń de janymyz bar ǵoı. Bir mezgil aıaq sýytaıyq ta, — desedi.

Sonda Besekbaı ádeıi Qonysqa estirte:

— Áı, jigitter-aı, senderdiń bul talaptaryń durys-aý, ony men oılamaı kele jatyr deısińder me? Biraq senderdiń bul talaptaryńdy men qostaı almaımyn. Óıtkeni aldaǵy kúnniń de qamyn oılaý kerek qoı. Tamaq bolsa taýsylýǵa taıandy. Bárimiz birdeı ashtan qyrylǵansha, ortamyzda bir adamnyń qyzyl maı bolmaı, semiz kúıinde turǵany da jón emes pe? Túbinde kádege osy Qonys jaramaǵanda, kim jarar deısiń? Gápteriń ishterińde bolsyn, — dep kózin qysady.

— E, olaı bolsa, maqul, — desedi jigitter.

Bul sózdi qulaǵy shalyp qalǵan Qonystyń júregi aýzyna tyǵylyp, denesi titirep ketedi.

— Besenjan, — deıdi ol birazdan keıin aıqaılap. Daýysy úreıli estiledi, — toqtańdar, men túsemin.

— Joq, siz túspeısiz, — deıdi Besekbaı qasyna jaqyndap kelip, — sizdiń sharshamaǵanyńyzdy osy jigitterdiń bári jón kórip keledi. Otyra berińiz.

— Alla razy bolsyn. Qudaı endi túıege kezegimen mingizsin, — deıdi ol túıeden domalaı túsip.

Osydan bastap Qonysty úreı bıleıdi. Tamaqty da az jep, tipti túıege minbeı qoıady. Kelesi kúni Besekbaı mańdaıynan ashshy teri sorǵalap kele jatqan Qonysqa:

— Qonyseke, sizdiń kezegińiz keldi. Túıege minińiz, — deıdi. Biraq Qonys azar da bezer bolyp, túıege jolamaıdy.

— Túıege minsem, bosańsyp qalarmyn. Jaıaýym janǵa jaıly eken, — dep alǵa túsip, tarta beredi.

Aýlyna aman-esen jetken kúni Qonys bozqasqa shalypty da, oǵan Besekbaıdy shaqyrypty.

— Iapyr-aı, Besekjan-aı, sol kezdegi qoryqqanym áli esimnen keter emes, — depti ol Besekbaıǵa.

— Onyń ózi de óte qorqynyshty sapar edi ǵoı, — depti Besek baı ony arqasynan qaǵyp.

---