InfoHub Logo

Besekbaı Shý óńirine qaqpan salady eken. Bir kúni qaqpanyna arlan qasqyr túsedi. Osy kezde Besekbaıǵa bir tosyn oı sap ete qalady. Ol qasqyrdyń aýzyn tumshalap býyp, qapqa salady da, aýzyn sodan keıin baryp bosatady.

Osy óńirde elge belgili bir sarań baı turypty. Birde Besek baı da osy úıde bir tún ash jatypty. Soǵan zyǵyrdany qaınap júrgen Besekbaı sol baıdyń úıine qaraı jol tartady.

Ol baı úıine ińir qarańǵysy túse keledi.

— Mynaý arqalaǵan qabyńnyń ishindegi bulqynyp jatqan ne nárse, Besekbaı, — deıdi baı tańyrqap.

— Bul — Qudaıdyń kók qoshqary. Qolyma ilikpeı júrgenine on jyl bolyp edi. Búgin sáti túskeni, Qudaı jarylqap. Endi men de óziń sıaqty bir baııtyn boldym, — deıdi Besek baı qýanysh belgisin sezdirip.

— Munyń sonshalyqty ne qasıeti bar eken? — dep suraıdy baı odan enteleı túsip.

— Munyń qasıetin aıtpańyz, baıeke, — deıdi Besekbaı, — budan qashqan saýlyq túgeldeı egiz týady. Bir qoıdan jyl saıyn eki qoı órip jatqanda, men baıymaǵanda kim baııdy?

— Sen bir oljańdy baıla maǵan. Jerden taýyp aldym demespin. Qazyq baýyńa bir besti al, — dep jarmasady baı.

Besekbaı qınalyp baryp, zorǵa kónedi.

— Jaraıdy, endeshe. Degeniń bolsyn! Biraq muny el jatqannan keıin baryp qoraǵa jiberińiz de, tósekke kelip, búrkenip jata qalyńyz. Bul barlyq qoıyńyzdy bir túnde qashyryp bitedi.

— Janýar-aı, á, — dep tańyrqaıdy baı.

Sonymen Besekbaı baı bergen bestige minip, aıaldamaı júrip ketedi. Qolynda baryn mise tutpaıtyn baı, el jatqannan keıin qaptaǵy «Qudaıdyń kók qoshqaryn» qoranyń ishine jiberedide, ózi úıine kelip jatyp alady. Qoranyń ishi astan-kesteń bolyp, aýyl ıtteri azan-qazan shýlaıdy.

Erteńine tursa, qoranyń ishi qyp-qyzyl ala qan. Saýlyqtardy qasqyr baýyzdap ketken. «Qudaıdyń kók qoshqarynyń» osynshalyq keremetin kórgen baı talyqsyp qulap túsedi.

---