InfoHub Logo

Maıdyń 12-kúni túnde bizdiń Aqan dos óte kesh jatty. Tósekke jatqannan keıin de kóp ýaqyt dóńbekship uıyqtaı almady. Qalaı uıyqtasyn! Endi 7 kúnnen keıin syn bastalady. Jáne anaý-mynaý emes, geografıadan bastalatynyn qaıtersiń.

Aqan kereýetiniń bas jaǵynan geografıa kitabyn alyp oqı bastady: «SSSR - dyń soltústigindegi ózender: Ob, Enıseı, Lena!»

Gúrs etip kitap jerge tústi. Aqan uıqyǵa ketti.

Bizdiń Aqan sonan soń,
Bir keremet tús kórdi.
Tús emes-aý, ǵajaıyp —
Tańqalarlyq is kórdi...

Túsinde: Maıdyń dál jıyrmasy eken deıdi. Syn bastalypty. Aqan kartanyń qasynda tur eken. Qolynda syn bıleti. Bılette: «SSSR - dyń soltústigindegi ózenderdi kórset» degen suraq tur (3-suraq). Aqannyń qolyndaǵy taıaq ta soltústikti qarmaıdy. «Lena, Ob, Enıseı...» deıdi ol aqyryn ǵana.

— Sonan soń?

Sonan soń Aqannyń oıyna eshteme túspeı qaldy. Oılanyp tur. Alaqaı, esine tústi.

— Sonan soń... SSSR - dyń soltústigindegi ózen Don... — dedi ol.

Munan ary ne bolǵanyn Aqannyń ózi de bilmeıdi. Bilgeni sol, ashýlanǵan Tynyq Don kartadaǵy geografıalyq masshtabtan asyp-tasyp ketken eken de, Aqandy tasqynymen alyp ketken eken.

Don tasqynymen Aqandy ne qıly araldarǵa, taýlarǵa, oıpattarǵa aparyp soqty. Don bulardyń bári týraly Aqannan surady. Qoryqqandyqtan ba, álde bilmedi me, Donnyń suraǵynyń birde-bireýine jaýap bere almady ol.

Aqan Dondy Kaspııge quıady dep júretin ǵoı. Mine, ras eken, Don tup-týra Kaspııge keldi. Sol arada Don Aqannan «mynaý qaı teńiz?» dep surady. Aqan kózin ashyp kók teńizge kóz jiberdi. Keremet! Onyń aldynda kúnde ózi kórip júretin alaqandaı teńiz emes, kólemi kóz jetkisiz jalpaq sý turdy.

— Joq, — dep oılady Aqan. Kaspıı emes eken. Jáne Donǵa «Bul Tynyq muhıt» degen jaýap berdi.

Ashýlandy, doldandy Don,
Aqan dosty qolǵa aldy ol.
Kóterip ap teńizge atty,
Qaıran Aqan sýǵa batty!

— Tur, qalqam! Saǵat segiz boldy, — degen anasynyń daýsymen oıanyp ketken Aqan «ýh» dep demin bir - aq aldy. Kalendarǵa qarady: maıdyń on úshi. Raspısanıege qarady: búgin geografıadan konsýltasıa eken. Ol endi osyǵan barýǵa asyqty.

Aqan mektepke bara jatqanda da: «SSSR - dyń soltústigindegi ózender — Ob, Enıseı, Lena...» dep kúbirleýmen boldy...

---