InfoHub Logo

(Ustazdy shákirtteriniń merekesimen quttyqtaýy)

Siz mándi de maǵynaǵa toly, ulaǵat pen ujdandy janyna serik qylǵan, oı men aqyl jáne parasat pen paıymdy júregine jaqyn etken, rýhanıat pen bilimdi jas urpaqtyń tárbıesine qaraı baǵyttap otyratyn Ustazdyq dep atalatyn ıgi mamandyqtyń jolyn qalap alǵan jansyz. Sizdiń Ustazdyq qyzmettegi árbir jylyńyz Sizge abyroı men tabys, baq pen bereke ákeldi, sonymen birge taǵy da jańa ári jarqyn múmkindikterge jol ashty.

Árbir bastalǵan jańa bir oqý jylynyń kúmis qońyraýynyń sıqyrly úni Sizge qýanysh syılady. Bul naǵyz ustazǵa ǵana tán sezim edi. Sol kúmis qońyraýdyń únimen birge baldyrǵan kúlkileri jarasa mektepke engen qanshama búldirshin Sizdiń aldyńyzdan tálim kórdi, ulaǵatyńyzdy tyńdady, óz mektebinen qanat qaqty. Olar qazir elimizdiń ár túkpirinde júr.

Siz únemi ustazǵa tán sergek oıdyń ıesi boldyńyz. Árbir tabystaryńyzǵa toqmeıilsý men toqyraý sizge jat edi, kerisinshe jańa izdenisterge jol ashty. Siz óz qoǵamyńyzdyń urpaqtan ne talap etip otyrǵandyǵyn jiti ańǵara aldyńyz. Óz boıyńyzdaǵy bilim men bilik darıasyn solaı qaraı burdyńyz, jas shybyqty solaı qaraı ıdińiz. Eger Siz osy jyldardyń ishinde maqtaý men qurmet kórseńiz, ustazdyq jolyńyzda, shynynda da, osyǵan laıyqty ister atqara alǵan edińiz.

Sizdiń ótken qurmetti jolyńyzdyń árbir ıiriminde shákirt júreginiń alǵys sezimi jatyr. Olardyń árqaısysy bir álem edi, olardyń árqaısysy jańadan ashylar bir dúnıe edi. Mine, siz osy bir baldyrǵan júrekterdiń rıasyz dosy, erteńge degen úmiti bola aldyńyz. Sizge osy úshin de óz shákirtterińiz alǵys aıtady.

Sizdi shákirtterińiz búgingi merekeńizben quttyqtaı otyryp, myqty densaýlyq, otbasyńyzǵa baqyt, ustazdyq jolyńyzǵa shyǵarmashylyq tabystar tileıdi. Ustazdyq qyzmetińizde ár ýaqytta shákirtterińizdiń alǵysyna bólene berińiz!

---