InfoHub Logo

Qurqulaq, sınga – organızmde S vıtamıniniń (askorbın qyshqyly) jetispeýinen bolatyn aýrý. Aýrý kóktem men qysta kóbirek baıqalady. Kúndelikti paıdalanatyn taǵam quramynda uzaq ýaqyt (4-5 aı) S vıtamıni óte az ne múldem bolmasa adam Qurqulaqqa shaldyǵady. S vıtamıniniń jetispeýi saldarynan qan azaıyp, adam ımýnıteti tómendeıdi. Aýrý belgisi: adam tez sharshaıdy, asqa tábeti tartpaıdy, álsirep, basy aınalady. Tis bosap, túse bastaıdy, tistiń túbi ońaı jaraqattalǵysh jáne qantalaǵysh keledi. Sonyń saldarynan adamnyń tamaq ishýi múlde qıyndaıdy. Adamnyń bulshyq eti men teri astyndaǵy klechatkada, teride, býyndarda qan quıylýy bastalady. Ásirese, kóp kúsh túsetindikten aıaqtyń qantalaýy, jıileıdi. Naýqastyń qulaq qalqany, murnynyń ushy kógeredi, adam denesi isinip, óli tinge aınalýy, ıistenýi bastalady, ár túrli juqpaly aýrýlarǵa shaldyǵý kúsheıedi. Qurqulaqqa der kezinde em qoldanbasa, naýqastyń ólip ketýi de múmkin. S-gıpovıtamınozynyń, ásirese, jas organızmge tıgizetin zıany kóp. Balanyń boıy baıaý ósedi, salmaq qosýy azaıyp, mı qabileti baıaý damıdy. Aýrýdan aldyn ala saqtaný úshin kúndelikti taǵamda vıtamın jetkilikti, ásirese, S vıtamıni kezdesetin qymyz, kókónis, shıe-jıdekter, tuzdalǵan kapýsta, ne askorbın qyshqyldy preparattar men quramynda belogi bar et, sút, jumyrtqa, balyq taǵamdary qajetti mólsherde bolýy shart. Askorbın qyshqyldy preparattardy qoldaný arqyly emdeıdi.

A. Aldashev

---