Sensiń dosym, jibek minez Jibegim,
Seni ǵana súıem - kýá júregim.
Sýyq joldan saqtaıtyn sen - perishtem,
Sen bolmasań, azyp-tozyp ólemin.
Túrli jerde, túrli shaqta tańymyz
Atsa-daǵy, súıispep pe edi janymyz?
Bizdi jan ǵoı jaqyn qylǵan, Jibegim,
Bastaǵan joq essiz ystyq qanymyz.
Esińde me? Bir jyl... kúzdiń kúni edi,
Kúzdi kúnniń salqynshalaý túni edi.
Jaryn, tastap, túnde meni baqshaǵa
Kórý úshin izdep kelgen kim edi?
Ol túnnen soń talaı-talaı jyl ozdy,
Essiz jaryń Aıǵa qolyn kóp sozdy.
Aspanǵa órlep, talaı qulap, mert boldym,
Zaman ozdy, júrek sóndi. Jan tozdy.
Ómir - japan. Aryp, sharshap júrgenim,
Essiz edim, ońdy-soldy kórmedim.
Toǵyz joldyń torabynda turǵanda,
Jyly - byltyr, seni taǵy kórgenim.
Kórdiń de sen, ashtyń taza qushaǵyń,
Qushaǵyńda jas balaǵa uqsadym.
Sol kezimde bar kúnádán pák bolyp,
Degenim ras: «Sensiń jarym, qosaǵym».
Sol kúnnen sol taǵy biraz kún ótti,
Umytqandaı boldym seni - Jibekti.
Sen sózime, jan-júregim, Jibegim,
Toqtata almaı qalyp edim júrekti.
Sen jyladyń, kóziń jasyn kórmedim,
Zarladyń sen, zaryń qulaqqa ilmedim.
Men jel edim, kettim sonda jel qýyp,
Kóz jasyńnan sadaqa bop ólmedim.
Aılar ótti, aı kórindi, óldi jyn,
Aılar ótti, aıyryldy kún men tún.
Aılar ótti, ishken ýdan aınydym,
Aıqyn boldy aqyrynda jalǵan, shyn.
Bildim: maǵan jar ekensiń sen ǵana,
Bildim: saǵan jar ekenmin men ǵana.
Sońǵy kezde seni kórmeı, Jibegim,
Ashyp kórshi, júregimde myń jara.
Seni kórmeı, kózim kórge aınaldy,
Júregime sansyz qasiret baılandy.
Kóp kún endi kórinbeısiń, qashasyń,
Júregińniń mahabbatyn kim aldy?
Essiz jaryń zarlap endi qalar ma?
Zarlaı-zarlaı qara jerge barar ma?
Bir jyl boıy teńiz bolyp tógilgen
Kóz jasynan Jibegim de tanar ma?!

---