InfoHub Logo

Ertede bir jigit baı bolýdy armandapty. Ol bir danyshpanǵa baryp:

— Meniń baı, dáýletti bolǵym keledi. Ne keńes beresiz?, — deıdi.

— Baılyqty ne isteısiń. Onanda saǵan ahıretke kerek baılyq bereıin, — deıdi. Jigit qoımaıdy. Danyshpan:

— Qazir ǵana bir baı dúnıe salyp edi. Jurt soǵan qabir qazyp jatyr. Sol kórge bir saǵat túsip shyqsań, baıdyń bar baılyǵyn saǵan alyp bereıin, — deıdi. Jigit qýanyp ketip, shartyna kelisedi. Danyshpan:

— Qoryqpaısyń ba? — dep suraıdy. Jigit:

— At basyndaı altyn berseń boldy. Bir saǵat emes, bir kún jatyp shyǵamyn, — deıdi.

Danyshpan jigitti qazylyp jatqan kórge ákeledi. Ony qabirge kirigizip, jatqyzyp aýzyn jaqsylap bekitedi. Bir kezde jigittiń shyńǵyrǵan daýysy shyǵady. Jurttyń qabirdi ashqany sol edi, jigit atyp shyǵyp qasha jóneledi. Danyshpan ony ázer toqtatyp:

— Áı, ne boldy? — deıdi. Jigittiń óńi qashyp, túri bozaryp ketken eken.

— Altyny da qurysyn, baılyǵy da qurysyn. Kórde kórgen azabymdy, tartqan mashaqatymdy sózben aıtyp jetkize almaımyn, — deıdi.

— Ne kórdiń sonda?

— Kórge túskenim sol edi, janym kózge kórindi. Qaptaǵan qurt-qumyrsqa, jándik ataýly jabylyp tánimdi shaǵa bastady. Kenetten kókten bir Qarysh atty jylan atylyp kelip keýdeme qondy. Aıyr tilin shyǵaryp shaqpaq boldy. Buryn jolda kele jatyp, jol shetinde otyrǵan qaıyrshyǵa bir úzim nan berip edim. Sol nan Qudaıdyń qudyrtimen paıda bolyp maǵan qalqan boldy. Qarysh nanǵa bata almaı ketip qaldy, — deıdi áreń sózge kelip. Danyshpan:

— Ne isteıin? At basyndaı altyn bereıin be, baıýdyń jolyn úıreteıin be? Jigit:

— Joq, maǵan tek qaıyrymdylyq jasaýdy úıretińiz. Denim saý bolsa maldy ózim-aq tabam, — depti.

---