InfoHub Logo

Qyrǵyzstan prezıdenti Sadyr Japarov qazaq pen qyrǵyz arasyna iritki salýǵa tyrysqan aqparattyq shabýyldarǵa jaýap berip, Facebook paraqshasynda arnaıy jazba jarıalady. Ol eki halyqty bólýdi kózdegen arandatýshylarǵa qarsy turýǵa shaqyrdy.

Japarovtyń ún qatýyna «PolıtPrognoz» YouTube arnasynda jarıalanǵan «Taına Kenesary hana» atty vıdeo túrtki bolǵan. Atalǵan vıdeoda Kenesary han men qyrǵyz arasyndaǵy qaqtyǵys máselesi kóterilip, tarıhty burmalaý áreketi baıqalǵan.

Qyrǵyz lıderi Kenesary Qasymulynyń otarshyldyqqa qarsy kúresin moıyndap, ony “naǵyz batyr” dep ataǵanymen, onyń qyrǵyz jerine basyp kirip, soǵan laıyq jaýap alǵanyn tarıhı shyndyq retinde moıyndaý qajet ekenin aıtty.

Japarovtyń aıtýynsha, Kenesary men Ormon hannyń arasyndaǵy teketires bılik pen ústemdik úshin bolǵan. Ormon hannyń áskerı aılasy – «Ormon opýza» arqyly qyrǵyz áskeri jeńiske jetken. Prezıdent shaıqastyń naqty Tokmok mańynda ótkenin, orys áskeriniń qatyspaǵanyn, bul – taza qazaq-qyrǵyz qaqtyǵysy bolǵanyn basa aıtty.

«Qazaq pen qyrǵyz ejelden týys halyq. Aramyzdy ajyratýǵa tyrysatyn kúshterge boı aldyrmaıyq. Bul – birlikti qajet etetin zaman. Meniń ájem – qazaq qyzy. Biz bir-birimizge jıen, týys halyqpyz», – dedi ol.

Sońynda Sadyr Japarov jastardy arandatýshylarǵa ermeı, tarıhı máselelerge obektıvti baǵa berýge, eki eldiń dostyǵyn nyǵaıtýǵa shaqyrdy.