Serbıa

Novı-Sadtaǵy tragedıadan keıin bastalǵan jappaı narazylyq tolqyny Belgrad kóshelerin dúr silkindirdi,dep habarlaıdy Infohub.kz.

Serbıa astanasy Belgradta 100 myńnan astam adam kóshege shyǵyp, prezıdent Aleksandr Výchıchtiń otstavkasyn talap etti. Bul el tarıhyndaǵy eń aýqymdy narazylyq aksıalarynyń biri retinde baǵalanyp otyr.

Jappaı narazylyqtyń bastalýyna Novı-Sad qalasyndaǵy temirjol vokzalynyń beton shatyrynyń qulaýy sebep boldy. 15 adamnyń ómirin jalmaǵan bul apat serb qoǵamynda tereń rezonans týdyrdy. Narazy halyq muny bıliktegi sybaılas jemqorlyqtyń jáne nemquraılylyqtyń saldary dep esepteıdi.

Bastapqyda kóshege stýdentter shyqsa, keıin olarǵa fermerler, muǵalimder, baıkerler, qarapaıym qala turǵyndary qosyldy. Traktor aıdaǵan sharýalar da sherýge qatysyp, narazylyqtyń qanshalyqty aýqymdy ekenin kórsetti.

Serbıa polısıasynyń málimetinshe, narazylyq aksıasyna keminde 107 myń adam qatysqan. Eldegi opozısıalyq partıalar bul kórsetkishtiń budan da joǵary ekenin aıtady.

Prezıdent Aleksandr Výchıch bul sherýlerdi «syrtqy kúshterdiń aıtaqtaýy» dep atap, qyzmetinen ketpeıtinin málimdedi. Alaıda, úkimettegi ózgerister bastalyp úlgerdi—premer-mınıstr Mılosh Výchevıch qyzmetinen ketti.

Sherýshilerdiń basty talaby—Výchıchtiń bılikten ketýi, sybaılas jemqorlyqqa qarsy naqty reformalar júrgizý jáne eldegi ádiletsizdikke toqtaý salý. Kópshilik muny Serbıadaǵy demokratıalyq ózgerister úshin mańyzdy kezeń dep baǵalap otyr.

Belgradtaǵy narazylyqtar áli de jalǵasýda. Bul oqıǵalar Serbıanyń saıası sahnasynda úlken ózgerister ákelýi múmkin. Halyq bılikke óz daýsyn estirte ala ma? Bul aldaǵy kúnderdiń enshisinde.