Aı jaryq, salqyn aýa, kúzgi túnde,
Uıyqtaǵan úlken shahar jatyr kúıde.
Jalǵyz-aq tyrys shákirt kitap ustap,
Esinep oıaý otyr páter úıde.
Degenmen otyr oıaý jalǵyz súlde,
Umytqan basqa istiń bárin múlde.
Áketken oı jetelep, rýhyn bılep,
Alysqa áldeqaıda japan túzge.
Oılaıdy ol: ashsam syryn, tapsam ǵylym,
Jurtym-aý qylsam eńbek, bolyp qulyń...
Kitapty eki qoldap qysyp ustap,
Iirip otyr ishten qıal jibin.
Muqtajdyq meıirimsiz jolyn bógep,
Baılar joq muny kórip bergen kómek.
Túgeldep kıim, tamaq, oqý haqyn,
Shamasy az jetkize almaı júrgen júdep.
Kónip júr tarshylyqqa neshe jyldaı,
Qys oqyp, jaz aqsha izdep, eshbir tynbaı.
Shydasa kóp kalǵan joq, maqsut jaqyn,
Abyroı, denge saýlyq berse qudaı.
Ia, alla! Talapkerdiń baqytyn ash,
Aq júrek paıdaly ispen ataǵyn shash.
Ultyna qarańǵyda qamaýly ósken
Jarqyrap jaryq sáýle bolǵandaı bas.
Myń dildá bilimdiniń jalǵyz sózi,
Tańyrqap jurttyń buǵan turǵan kezi.
Sen bolyp baqyt tańy nur túsirseń,
Sypyrylyp qaıǵy bulty keter ózi.
Aınymaı tutqan jolyń bolsyn mynaý:
Azattyq, aǵaıyndyq, teńdik suraý.
Taısalmaı durystyqqa jandy qısań,
Boryshy adamdyqtyń sonda tur-aý...

---