InfoHub Logo

Venesıa – dúnıe júzindegi eń keremet, kózdiń jaýyn alyp, júrekti eljireter jáne tarıhy orasan zor, sonysymen ataǵyn keńinen shyǵarǵan qala. Áıgili Italıa memleketiniń eń kórikti alqaptarynyń biri, erekshe sulýlyǵymen ondaǵan jyldardan beri týrıster mekenine aınalǵan Venesıa sonaý zamandardan beri sýdyń ústinde ózgermegen kúıinde ornalasqan. Bul tańǵajaıyp qalany óz kózimen kórip, aralap, onyń óz aǵymymen ótip jatqan ómiriniń bir múshesi bolyp, sodan lázzat alyp, shynaıy ertegide bolyp qaıtý - búgingi tańdaǵy kózi ashyq, sanasy oıaý árbir azamattyń armany dese qate bolmas, óıtkeni bundaı baqyt eki adamnyń birine berile bermes. Bulaı deýimniń sebebi, Venesıa – máńgilik qala emes, ondaǵy sý bıiktigi jyldan-jylǵa kóterilip keledi. Ǵalymdardyń paıymdaýynsha, Venesıany shamamen 80 jyldan keıin sý tolyǵymen basyp qalýy múmkin. Minekeı, osyndaı ualany kórý baqyty buıyrǵan adamdardyń biri menmin desem de bolady.

Ǵajaıyp mekenge baryp, el men jer tanýdan bólek, tanymal Venesıa ýnıversıteti Ka Foskarıda evropalyq sapaly bilim alýymda jolymdy baǵyttaýǵa sebepshi bolǵan aıaýly bilim ordasy Ál-Farabı atyndaǵy Qazaq Ulttyq Ýnıversıtetinde belsendi túrde qoldaý taýyp, stýdentterge úlken múmkindikter beretin halyqaralyq bilim almasý aıasyndaǵy akademıalyq utqyrlyq baǵdarlamasy bolyp tabylady. Naqtyraq aıtqanda, Italıadaǵy tájirıbelik saparda 2019 jyldyń 6-shy qyrkúıeginen 2020 jyldyń 1-shi aqpanyna deıin bolýyma sebepshi bolǵan - akademıalyq utqyrlyq tusyndaǵy halyqaralyq oqytý baǵdarlamalarynyń biri bolyp tabylatyn «Erasmýs +» baǵdarlamasy.

Qazirgi tańda men bolashaqtaǵy elimizdiń tarıhı qazynasy men arhıv isi úshin mańyzy óte úlken «Muraǵattaný, qujattaný jáne basqarýdy qujattamamen qamtamasyz etý» mamandyǵy boıynsha joǵarǵy bilim alyp jatqan jónim bar. Byltyrǵy jyly Ýnıversıtet saıtynan osy Erasmýs baǵdarlamasy bergen jarnamany kórip, suralǵan talaptar boıynsha ózimdi usynyp, baǵymdy synap kórdim. Qýanyshyma oraı, Ka Foskarı ýnıversıtine qabyldanyp, Erasmýs baǵdarlamasy boıynsha shákirtaqy taǵaıyndalatyn boldy. Osylaısha, kelesi jarty jylda alǵan oqý jáne mádenı tájirıbem bastaldy deýge bolady.

Ka-Foskarı ýnıversıteti – álemniń túkpir-túkpirinen jas talanttardy tabýǵa jáne qoldaýǵa umtylatyn aldyńǵy qatarly bilim berý ortalyǵy. Ondaǵy bilikti oqytýshylar oqytýdyń ınovasıalyq ádisterin qoldanady, sondaı-aq bolashaq mamandarǵa ártúrli zertteýler júrgizýge kómektesedi. JOO-nyń taǵy bir basty mindeti – stýdentter men túlekterge mamandyq boıynsha is tájirıbelerinen ótýge múmkindik berý. Ka Foskarı kóptegen halyqaralyq uıymdarmen, saýda palatalarymen jáne mádenı ortalyqtarmen áriptestik qarym-qatynasty qoldaıdy. QS World University jáne Times World University reıtıńine sáıkes, Ka Foskarı Ýnıversıteti gýmanıtarlyq ǵylymdardan bilim beretin álemniń úzdik Top-150 joǵarǵy oqý oryndaryna jatady.

Baǵdarlama boıynsha belgilengen bir semestr boıy men Ka Foskarı ýnıversıtetinde «Adam men kompúter arasyndaǵy ózara baılanys jáne aqparattyq kórnekilik», «Til oqytý ǵylymynyń teorıasy» jáne «Italán tiline kirispe» atty pánderin oqydym. Bul pánder boıynsha ýnversıtet profesory Karmel Merı Kýnan, ýnıversıt zertteýshisi Pıttarello Fabıo, lıngvısıka salasyndaǵy pedagog jáne ekpert Elena Baların jáne Portlend memlekettik ýnıversıtetiniń ıtalán tili kafedrasynyń dosenti, PhD oqytýshy Sılvıa Boerodan bilim aldym. Italán tilinen basqa dárister men semınarlar aǵylshyn tilinde júrgizildi. «Adam men kompúter arasyndaǵy ózara baılanys jáne aqparattyq kórnekilik» páni boıynsha «Orange», «RawGraphs», «Tableau», «Canva» sekildi aqparatty kórnekileýshi baǵdarlamalarmen jumys isteýdi úırený muraǵat isi salasyna bilim alyp jatqandyǵymnan, men úshin óte paıdaly boldy. «Til oqytý ǵylymynyń teorıasy» páni boıynsha men tilderdi oqytýdyń túrli ádis-tásilderimen, ásirese, búgingi tańda qoǵamnyń barlyq salalarynda keńinen qoldanylatyn jáne halyqaralyq til bolyp tabylatyn aǵylshyn tilin úıretýdiń metodologıalyq negizderimen tanystym. Sondaı-aq, oqý prosesi barysynda men tezıster, maqalalar, baıandamalar, dısertasıalar sıaqty ǵylymı jumystardyń qurylymdaryn durys jazýdy jáne durys tujyrym jasaýdy úırendim. Ýnıversıtet kitaphanalarynda jumys jasap, meniń magıstrlik dısertasıalyq jumysym boıynsha qujattyq lıngvısıka týraly birneshe materıaldar taptym. Oqý semestriniń sońynda men maǵan jeke berilgen tapsyrma boıynsha mýzeılerde shet tilin (aǵylshyn tilin) oqytý boıynsha shaǵyn ǵylymı joba jazdym. Osy pánder boıynsha jınaqtaǵan bilimimdi qoldaný muraǵat isiniń elektrondyq aqparattyq júıeleri jumystaryna, sonymen birge, shynaıy jáne vızýaldy mýzeılerde qoıylatyn kórmelerdegi arhıvtik qujattar tarıhynyń aǵylshyn tiline sapaly turde aýdarylýy sekildi jumystaryna septigin tıgizýi múmkin.

Qorytyndylaı kele, oqý barysynda magısterlik dısertasıalyq jumysymnyń taqyrybyna etene jaqyn keletin pánderdiń bolamaǵandyǵyna qaramastan, jalpy, bul baǵa jetpes ǵylymı jáne mádenı tájirıbe syılaǵan qanaǵattandyrarlyq sapar boldy. Men bul ótken tájirıbe eki ýnıversıtet arasyndaǵy yntymaqtastyq qarym-qatynastyń bolashaqta odan ári damyp, órbýine áserin tıgizedi dep úmittenemin. Sonymen birge, osy aqparatpen bólise otyryp, qazaq jastarynyń shet elge baryp, sapaly bilim nárin sýsyndatyp, bolashaqta elimizge eren eńbek etýlerine túrtki bolamyn dep sengim keledi.

Nurahýn Á.A ál-Farabı atyndaǵy Qazaq Ulttyq Ýnıversıtetiniń  Tarıh, arheologıa jáne etnologıa  fakúltetiniń 2 kýrs magıstranty 

Nusqabaı P.N ál-Farabı atyndaǵy Qazaq Ulttyq Ýnıversıtetiniń Tarıh, arheologıa jáne etnologıa fakúltetiniń aǵa oqytýshysy, PhD

---