InfoHub Logo

Kókem alyp kelgen qamys qulaq shubar taıym bolatyn. Shań tımestiń tuqymy. Ózi qoıdaı jýas. Kúnde ústi-basyn sıpap, keshke ózim sýaryp
turamyn.

Asqar baıdyń aýylynda «bádik» bar eken, bizdiń aýyldyń bozbalalaryn shaqyrǵan. Taıymdy sýaryp men de bádikke barmaqpyn. 

Qap-qarańǵy. Kózge túrtse, bilmeısiń. Tek aspanda juldyzdar monshaqtaı jyltyraıdy, tym-tyrys. Quzdyń eteginde bulaq syldyraıdy. Bulaqqa qıalap túsetin tar soqpaqpen kele jatyrmyn. Eki jaǵym quz. Ústime tónip tur. Bu bir - qorqynyshty jer edi. Qoryqqannan denem túrshigip ketti. Tómende sýdyń tolqyny tasqa soǵylyp, shýlap jatyr. 

Bir ýaqta astymdaǵy shubar taı edireıip, pysqyryp, keıin shegindi. Kózim sharasynan shyqty. Basym dý etti. Júregim balǵamen urǵandaı tez soqty. Eki kózim alda. Ne de bolsa tez bolsa eken dep elip baramyn. Bir nárse qors etti. Taıym móńkip qaldy. Top ettim. Basym shyń ete tústi: jer qatty edi. Jambasym aýyryp qapty. Meshel adamdaı ornymnan zorǵa kóterilip, keıin júrdim. Ári taıymnan aırylyp, ári bádikten
qalǵanyma yza bolyp, jasymdy tyıa almaı úıge bardym, kórgen-bilgenimdi aıttym. 

Erteńine taıyma ishim qazandaı qaınady. Taıymdy izdep óleıin dep, aı dalaǵa qańǵyp kettim. Kúni boıy izdedim, tabylmady. Kesh boldy. Qoryqtym. Jaspyn ǵoı. Bar bitirgenim - jylaý. Qas qaraıa úıge qaıttym. 

Kelsem, taıym qazyqta baılaýly tur. Júregim aspanǵa kóterildi. Qýanyshym qoınyma syımaı ketti. Surastyrsam, taıym ózi kelipti, netken aqyldy! Sonan bylaı taıymdy burynǵydan da jaqsy kóretin boldym.

---