InfoHub Logo

25 shildede Qorǵanys mınıstrligi Otyrar aýdanynda josparly ushý barysynda Qarýly kúshteri Áýe qorǵanysy kúshteriniń EC-145 tikushaǵy radardan joǵalǵanyn habarlady. Sol sátten bastap jedel izdestirý jumystary bastalyp, berilgen baǵyt boıynsha áýe tekseristeri júrgizildi. Sorbulaq sý qoımasy mańyn qaraý kezinde Qazǵarysh sýretterinen janarmaı izi baıqalyp, sý qoımasyna jaqyn jerden tikushaqtyń birneshe bólshegi tabyldy. Sý astyndaǵy jumystar barysynda QR Qarýly Kúshteriniń áskerı qyzmetshileri shamamen 14 metr tereńdikten áýe kemesiniń ishinara synyqtary men bir adamnyń máıitin anyqtady. Arnaıy shtab qurylyp, izdeý sharalary jalǵasqanymen, apat ornyn tolyq tazartý birneshe kúnge sozyldy.

Apatta qaza tapqan komandırdi týǵan jerinde, Túrkistan oblysy Tólebı aýdanynyń Lengir qalasynda sońǵy saparǵa shyǵaryp saldy.

— Jastaıynan áskerı bolýdy armandady ǵoı. Kishkentaıynan tártipke baǵynyp, bizdi de tártippen júrgizetin. Aspanda qalyqtap júrýdi bala kezinen armandady. Búkil ómirin osy áskerı avıasıaǵa arnady. Kúndiz-túni ushty, myńdaǵan saǵattar jınady. Qatarynan qalmaı bilim aldy, jańa shyqqan oqý bolsa, bireýin de jibermeıtin. Tehnıkasyn jan-tánimen jaqsy kóretin. «Anashym, aspanda ushsam, qustaı qalyqtaımyn» deıtin, – dep eske aldy marqumnyń anasy.

2010 jyly Aqtóbedegi «Áýe qorǵanysy» oqý ornyna túsken ol 15 jyl boıy áýede minsiz qalyqtaý úshin bilimin jetildirip, myńdaǵan saǵattyq tájirıbe jınaǵan. Tehnıkasyna berilgen ofıser qatarlastary arasynda abyroıly boldy. Týystary onyń bet-júziniń apattan keıin de saqtalǵanyn taǵdyrdyń sońǵy syıy dep qabyldady.