InfoHub Logo

Qazir bizde myljyńdyqtyń mereıi ústem bolyp, sózdiń qadiri ketip tur. Oılaryna ne kelse sony jazady, aýzyna ne kelse,— sony aıtady. Mundaı jaǵdaıda bizdiń ulttyq máselelerimizdi baısaldy túrde talqylap sheshý múlde múmkin emes.

Bireýi eldiń ekonomıkasyn arttyrý úshin jospar kerek deıdi, ekinshisi — kúrdeli qor kerek deıdi, úshinshisi — nesıe kerek deıdi. Birtutas baǵyt bolmaǵan soń jurtshylyq pikirin qalyptastyrý qıyndaıdy jáne berekesizdik beleń ala beredi. Al eger biz barlyq máselelerdi sıflarǵa súıene otyryp ǵylymı negizde sheshsek, ol máselelerdiń barlyǵy baıaǵyda-aq rettelip bitetin edi. Qashanda bolsyn istiń túıinin sıfrlar sheshedi.

Káne, sıfrlarmen syrlasyp baıqaıyq.

Aıtalyq: halqymyzdyń ósý qarqyny jylyna úsh prosent, al ulttyq tabysymyzdyń kemý qarqyny eki prosent deıik. Bul jaǵdaıda ekonomıkany damytý úshin ekonomıkalyq óndiristiń ósý qarqyny eń keminde jeti prosent bolýǵa tıis. Al óndiriste eńbek etip júrgen jáne ulttyq tabystyń alpys prosentin qamtamasyz etken júmysshylar bul tabystyń on toǵyz prosentin ǵana alady. Budan neni bilýimizge bolady? Kelińiz, sıfrlardy sóıleteıik. Ekonomıkalyq óndiristiń ósý qarqynyndaǵy jeti prosentti alamyz da, halyqtyń ósý qarqynyndaǵy úsh prosentke kóbeıtemiz, tórtke bólemiz, qaldyǵyn on toǵyz prosentten alyp, sonsoń bes prosentke bólemiz. Qansha boldy? O! Bul oıynshyq emes! Endi buny alpys prosentke qosamyz, úsh prosentke kóbeıtemiz, úsh jarymǵa bólemiz. Sonsoń budan shyqqan nátıjege toǵyz júz seksendi, ıaǵnı baǵanyń osý prosentin qosamyz jáne 589561-di (meniń telefon nómirimdi) taǵy qosamyz. Qansha boldy? Mine, kórdiń be, alaqanyńa salǵandaı ap-aıqyn bop shyǵa keldi!

Árqashan osylaı isteý kerek. Máseleni talqylaýǵa kirispes buryn sıfrlardy saılap alǵan jón. Sodan keıin baryp eseptep kep jiberseń,— bári de bep-belgili bola qalady, jaǵdaıdyń áli de sonshama úmitsiz emes ekenin sezesiz... Bizdiń qurmetti premer-mınıstrimiz kez kelgen máseleni talqylaý úshin qashanda bolsyn áýeli sıfrlaryn saılap alady.

Eskertý. Eger siz máseleni sıfrlarǵa súıene otyryp taza ǵylymı turǵydan sheshýdi oılasańyz, basyńyzdyń razmeriniń týra jartysyn kórsetetin sıfrdy alyńyz da, ony boıyńyzdyń uzyndyǵyna kóbeıtip, sonsoń salmaǵyńyzǵa bólińiz...

Sonda, jer-kókten izdep taba almaıtyn ǵylymı aqıqat aqparlar sizdiń qolyńyzda bolyp shyǵady!

Áńgimeni orysshadan aýdarǵan Ǵabbas Qabyshev

---