InfoHub Logo

Úsh jolaýshy bir bulaqtyń basynda bir-birine kez bolypty. Bulaq bir tastaq jerden shyqqan, aınalasy qalyń bitken aǵash japyraqtary bulaqtyń ústine tógilip, sýy muzdaı, salqyn, shynydaı jyltyldap turǵan sonsha ádemi, taza bulaq eken. Sý shyqqan jerine bir qazandaı tasty bireý oıyp qorǵanysh qylyp, tastyń sýaǵar jerine jazý jazypty:

- Áı, jolaýshy, bolsań osy bulaqtaı bol,- dep. Manaǵy úsh jolaýshy bulaqtan iship qanǵan soń jazýdy oqyp, bireýi saýdager eken, ol aıtty:

- Bul jazylǵan aqyl sóz eken, bulaq kún-tún tynbaı aǵyp, alys jerlerge barady, bara-bara keńeıip, úlkeıedi, buǵan bóten bulaqtar quıyp, sóıte bara úlken ózen bolyp ketedi. Munan murat sol: sen de, adam, tynbaı qyzmet qyl, eshýaqytta jalqaýlanyp toqtap qalma, sóıtseń, aqyrynda, sen de zoraıyp muratyńa jetesiń degeni me dep bilemin, - dedi.

Ekinshi jolaýshy músápir molda eken, basyn shaıqap:

- Joq men olaı oılamaımyn, bul jazýdyń maǵynasy sizdiń oılaǵannan góri joǵaryraq soqsa kerek, bul bulaq: kim-kimge bolsa da daıar, ystyqtaǵandy salqyndatyp, janyn raqattandyrady, sýsaǵannyń sýsynyn qandyrady, onyń úshin eshkimnen aqy dámetpeıdi; bulaı bolsa adamǵa da ábiret sol: bireýge jaqsylyq etseń, ol jaqsylyǵyńdy eshkimge mindet etpe degeni bolsa kerek,- dedi.

Úshinshi jolaýshy kórkem kelgen bir ádemi jigit eken, bul úndemeı turdy. Joldastary: «Sen ne oılaısyn?» -dep surady.

Jigit aıtty:

- Meniń oıyma bóten bir nárse keledi: bul bulaqtyń sýy bir orynda tynyp turyp, shóp-shalam túsip, laı-qoqym bolsa, buǵan adam men aıýan munsha yntyq bolmas edi; bulaq kúni-túni tynbaı aǵyp tazalanyp turǵany úshin yntyq bolady. Olaı bolsa, jazýdyń maǵnasy: kóńilińdi, boıyńdy osy bulaqtaı taza saqta, neshik bulaqqa qarasaq kún tússe kúnniń, shóp tússe shóptiń sáýlesin kóremiz, kóńiliń sol reýishti syrtqa ashyq kórinip tursyn degeni me deımin,- dedi.

---