InfoHub Logo

         Erte zamanda bir aýyldyń apta saıyn bir taıynshasy zym-zıa joǵala beripti. Bul aýyldyń adamdary jabyla izdese de eshbir iz-túzin bile almapty. Tipti kórgen-bilgen, sezik alǵan birde-bir adam bolmapty.

         Sol aýyldyń basy qazandaı, sáldesi daǵaradaı Jaqyp degen moldasy bolypty. Molda kún saıyn uzaq namaz oqyp, onyń sońynan kózin jumyp alyp, jarty qulash qara ala taspıǵyn tartyp otyryp:

Aınalaıyn, taspıǵym senen,

Eshkim kúmán qylmas menen.

Aptasynda bir ǵana,

Lá-ılı-ha-al-al-la! – deıdi eken.

         Óziniń Bilál atty bir zerdeli shákirti moldanyń álgi sózin uǵyp alyp, ony óz ákesine buljytpaı bir kúni aıtyp barypty. Balanyń ákesi kúdiktenip, ishinen: «Teginde, moldanyń mynasynda bir gáp bar eken?» dep, kóp oılanypty...

         Ol jurttan aýyl kóship ketken soń, ákesi bes-alty adammen kelip, shettegi molda úıiniń jurtyn qarasa, dál moldanyń ózi jatatyn jer tóseginiń astynan tereń etip qazylǵan ura tabylypty.

         Álgi qambanyń betin ashsa, odan birneshe taıynshanyń kógergen terisi men saýdyraǵan súıegi shyǵypty.        Sonda óz kózderine ózderi senerin de, senbesin de bilmeı, birine-biri ańtarylyp qarap qalǵan aýyl aqsaqaldary:

         — As-taǵ-pı-rýl-la, endi ne desek eken?!

         — Basynda sálde, aýzynda alla!..

         — Mol-la-ńa da bolaıyn, onyń táspıǵyna da bolaıyn!

         — Áne, seniń zerdeli balań! – desipti.

         Saly sýǵa ketken aqsaqaldar aýylyna kelip:

         — Burynǵylar «Moldanyń aıtqanyn iste, istegenin isteme» deýshi edi, sol ras eken...

         — Endi, munan bylaı bizderge aıtqanyn tyńdaýǵa, istegenin kórýge jazbasyn. Munyń eń abzaly – endi «Qutyrǵannan qutylǵan» – ǵoı!

         — Mynaý, ýaǵyz aıtyp eldi de jarylqamasyn, molda bolyp ózin kózge de kórsetpesin! – desip, urlaǵan maldaryn óndirip almaq túgili, mollasyna «mal urlapsyń» dep aıtýǵa da uıalypty.

---