Bar eken taýdan aqqan taza bulaq,
Túk el joq mańaıynda qylǵan turaq.
Jaǵalaı bitken aǵash japyraqty,
Jaıqalyp kún men jelden turǵan qorǵap.
Shildeniń tas qyzdyrǵan ystyq kúni,
Móp-móldir sýy salqyn, áıbat túri.
Shynydaı jaltyraǵan tazalyǵy
Kórinip aınadaı bop jatqan túbi.
Jıhangez úsh jolaýshy kele jatqan,
Shóldegen ystyq kúnde tańdaı qatqan.
Kez bolyp baqytyna álde qalaı,
Sý iship meıiri qanǵan sol bulaqtan.
Rahat sýsyn qanyp, jan jaılanyp,
Qarap tur aqqan sýǵa qaıran qalyp.
Kóredi sýaǵardan jazýly tas,
Jaǵalap joǵaryraq júrse baryp.
Úsheýi muny kórip qaldy toqtaı:
Japanda jazýy bar netken taqtaı?!
Jazylǵan oqyp kórse, sózi mynaý:
«Bolsań bol, eı, jolaýshy, bul bulaqtaı!»
Saýdager eken biri úsheýiniń,
Tyńdańyz sondaǵy aıtqan sózi munyń:
- «Iapyr-aı! Bul jazylǵan aqyl eken,
Ótkizbeı aǵar bulaq kúni-túni.
Alysqa barmakshy ol tynbaı aǵyp,
Qosylmas ózge bulaq buǵan naǵyp?
Zoraıyp aqyrynda ózen bolyp,
Sýynan paıdalanar tamam halyq.
Menimshe, munan murat, maǵyna sol,
Kásip qyl, jalqaýlanbaı, talapty bol.
Bulaqtaı maqsudyna sen de jetip,
Basyńa tıgizersiń paıdandy mol».
Ekinshi ǵalym eken asa zerek,
Ol aıtty basyn shaıqap, nazdanyp bek:
- «Bul sózdiń maǵynasy siz aıtqannan,
Menimshe, bolsa kerek tereńirek.
Bul sózden- ǵıbrat sol adamzatqa,
Tegin kyl jaqsylyqty, pulǵa satpa.
Bulaqtaı kez kelgenge daıar bolyp,
Mindetsiz bilimińdi tarat halykka».
Jas jigit jolaýshynyń úshinshisi,
Ádemi kórer kózge kórkem kisi.
Toqtalyp esh nárse aıtpaı turyp edi,
- «Ne oılaısyń, sóıle, myrza!» - dedi ózgesi.
Bul jigit berdi jaýap sonda turyp:
«Ornynda aqpaı bulaq tursa tunyp.
Shóp-shalam, shań-topyraq, iseleý basyp,
Sarqylyp qalar edi áli-aq quryp.
Jurt qumar bulaq taza bolǵandyqtan,
Jazýdan maǵynam sol meniń uqqan.
Kóńlińdi boıyńmenen taza saqta,
Páklikpen artylarsyń sonda jurttan.
Aq peıil, taza júrek, júziń jarqyn,
Sekildi móldir bulaq sýy salqyn.
Bolǵandaı dertke shıpa jany súıip,
Shúbásiz paıdalanar bolsyn halqyń».

---