InfoHub Logo

Túrkistan oblysynda jappaı kóktemgi aǵash egý dástúri bastaldy. 1 naýryz kúni Bekzat shaǵynaýdanyndaǵy saıabaqta ótken ekologıalyq sharaǵa oblys ákimi Nuralhan Kósherov, quqyq qorǵaý organdarynyń basshylary, máslıhat depýtattary, qoǵam qaıratkerleri, úkimettik emes uıymdar, belsendi jastar men eriktiler qatysty.

İs-shara «Taza Qazaqstan» ekologıalyq baǵdarlamasy aıasynda uıymdastyrylyp, qorshaǵan ortany qorǵaý, aımaqty kógaldandyrý jáne ekologıalyq mádenıetti qalyptastyrý maqsatynda ótkizildi. Túrkistan qalasynda osy kúni 1500-den astam adam qatysyp, 5 myńnan asa kóshet otyrǵyzyldy. Kóshetterdiń basym bóligi terek, qaraǵash jáne úıeńki boldy.

Óńir basshysy Nuralhan Kósherov ekologıalyq is-sharanyń mańyzdylyǵyn atap ótti:
"Barshańyzdy Alǵys aıtý kúnimen jáne qasıetti Ramazan aıynyń kelýimen quttyqtaımyn. Óńirimizde «Taza Qazaqstan» baǵdarlamasy qarqyndy júzege asyrylýda. Ár turǵyn óz úıin, aýlasyn, kóshesin taza ustasa, qoǵam da tazarady. Sondyqtan qorshaǵan ortany birge qorǵaýymyz kerek. «Bekzat» shaǵynaýdanynda saıabaq salý týraly turǵyndardyń ótinishi bolǵan, búgin sol saıabaqty kógaldandyrý jumystary bastaldy. Barlyǵymyz «Taza Qazaqstan» aksıasyna úles qosaıyq," – dedi ol.

Aksıa barysynda jergilikti ónerpazdar konserttik baǵdarlama usynyp, turǵyndarǵa kóterińki kóńil-kúı syılady. Kógaldandyrý jumystary aldaǵy ýaqytta da jalǵasady.

Ekologıalyq bastamaǵa qoldaý

Túrkistan oblysynda ekologıalyq ahýaldy jaqsartý maqsatynda aǵash otyrǵyzý dástúri jyl saıyn júrgiziledi. Bıyl da kógaldandyrý jumystary kúsheıtilip, qalany jasyl jelekke aınaldyrý kózdelýde. Bul bastama aýanyń sapasyn jaqsartyp, óńirdiń ekologıalyq jaǵdaıyna oń áserin tıgizedi.

Turǵyndar men belsendilerdiń qoldaýymen júzege asqan bul is-shara Túrkistandy kógaldandyrýǵa jáne qorshaǵan ortany qorǵaýǵa baǵyttalǵan mańyzdy qadamdardyń biri boldy.