InfoHub Logo

QR Bilim jáne ǵylym vıse-mınıstri Asqat Aımaǵambetov memlekettik granttardy qazaq jáne orys toptaryna bólmeı, barlyǵyna birdeı taǵaıyndaýǵa qatysty usynysty túsindirdi.

Onyń aıtýynsha, qazirgi kezde granttar eki topqa bólek beriledi. Qazaq tildi topta úmitkerler alǵan upaılaryna qaraı tegin bilim alýǵa múmkindik alady. Orys tobynda da solaı. Al jańa usynysqa sáıkes, bir mamandyq boıynsha jalpy granttar bólinedi de, qazaq tildi jáne orys tildi toptar konkýrsqa birdeı qatysady. Sóıtip, ortaq bir tizim shyǵarylady.

«Búginde biz árbir toptyń upaı sanyna qaraımyz. Sosyn grant taǵaıyndaımyz. Al jańa tártip boıynsha jasasa, jalpyǵa birdeı konkýrs bolady. Upaı sanyna ǵana qaraımyz. Kim qandaı upaı aldy, soǵan sáıkes grant bólinedi. Tilge baılanysty emes. Máselen, pedagog mamandyǵyna 100 oryn bólinse, sol 100 orynǵa qazaq tilinde oqyǵan balalar da, orys tilinde bilim alǵan balalar da talasady. Sonda eń joǵary upaıy bar 100 bala grantqa ótedi. Ázirshe, bul usynys qana. Biz onyń bárin jan-jaqty talqylaıtyn bolamyz», - dedi A.Aımaǵambetov QazAqparat tilshisine bergen suhbatynda.

Aıta keteıik, Úkimettiń búgingi otyrysynda QR Bilim jáne ǵylym mınıstri Erlan Saǵadıev ulttyq biryńǵaı testileýge qatysty birqatar ózgeristerdi jarıalady. «Bizge pedagogtar men ata-analardyń tarapynan jyl boıy usynystar túsip jatady. Onyń ishinde ulttyq biryńǵaı testileý men keshendi testileý birdeı fýnksıany atqarǵan soń, osy eki testileýdi birge ótkizýge qatysty usynys bar. Ekinshi, UBT joǵary oqý ornyna túsetin emtıxan bolǵandyqtan, ony ótkizý sharalarynan mektep muǵalimderin bosatý. Úshinshi, mektep balalaryn UBT-ǵa emes, mektep baǵdarlamalaryn ıgerýge daıyndaý qajet bolǵandyqtan, mektepterde synama, "probnyı" testterin ótkizbeý. Tórtinshi, memlekettik bilim granttaryn oqý tiline - qazaq nemese orys tilderine bólmeı taǵaıyndaý jáne taǵy birneshe usynys bar»,- deıdi E.Saǵadıev.

Resmı málimetke sáıkes, bıylǵy ulttyq biryńǵaı testileýge respýblıka boıynsha 100 myńnan astam túlek ótinish bildirdi. Olardyń 75 prosenti qazaq tilinde oqýǵa nıet etse, qalǵan 25 prosenti orys tildi bólimderdi tańdaǵan. Memlekettik granttar da solaı taratyldy. UBT-da ortasha upaıdyń kórsetkishi 83-ti qurady. Shekti deńgeı - 50 upaıdy 84 myń túlek jınady. Test tapsyrǵandar smartfon, roýter, modem sıaqty 82 myńnan astam qural-jabdyqty, sondaı-aq, 28 myńnan astam shpargalka alyp ótpekshi bolǵan.

QazAqparat

---