InfoHub Logo

Atyraý oblysy ákimdigi Telegram chat-kanaly ashylǵaly 2200-den asa ótinimderdi qarady. Al, «Atyraý Sıfrlyq Qabyldaý» mobıldi baǵdarlamasyna 2018 jyldyń basynan beri 1087 shaǵymdar kelip túsipti. Bul týraly Atyraý oblysy ákimdiginiń baspasóz qyzmeti habarlady.

Ákimdik turǵyndarmen baılanys ornatý maqsatynda áleýmettik jeliler men mobıldi baǵdarlamalardyń kómegin paıdalanady. Máselen, WhatsApp qosymshasy men Telegram kanaldaryn aıtsaq bolady. Bular óz kezeginde turǵyndarmen baılanysta tıimdiligin kórsetti.

Baspasóz qyzmetiniń málimetine sáıkes, óńirde 2016 jyldan bastap qaladaǵy komýnaldyq qyzmettiń jumysyn jandandyrý maqsatynda sharalar bastalǵan bolatyn.

«Turǵyndar tarapynan olardyń jumystaryna, keri baılanystyń joqtyǵyna, suranymdar men shaǵymdarǵa jaı áreket etýlerine qatysty narazylyqtar boldy, WhatsApp qosymshasy arqyly barlyq negizgi komýnaldyq qyzmetterge jedel jeli ashtyq, ol jumystyń jedeldigin, tıimdiligin joǵarylatty», – delingen habarlamada.

Aımaqta «c» memlekettik baǵdarlamasyn júzege asyrý maqsatynda Telegram qosymshasy arqyly «Atyraý oblystyq ákimdigi» men «Atyraý Sıfrlyq Qabyldaý» chat-kanaldary jumys isteýde.

Atyraý oblysy ákiminiń birinshi orynbasary Serik Shapkenovtyń aıtýynsha, mobıldi qosymshalardaǵy chat-kanaldardy ashýdaǵy maqsat – jergilikti atqarýshy organdardyń qyzmet sapasyn arttyrý jáne halyqtyń saýaldaryna tezirek jaýap berý.

«Chat-kanal men mobıldi qosymshalar arqyly kórsetiletin qyzmetter jergilikti atqarýshy organdarǵa eldimekenderdegi máselelerdi anyqtaýǵa septigin tıgizedi. Ol jol qozǵalysy qaýipsizdigin jaqsartýǵa, halyqpen ashyq dıalog ornatýǵa yqpal etedi. Olardy ashýdaǵy maqsat- jergilikti atqarýshy organdardyń memlekettik qyzmet kórsetýin, jaýap berýin qoljetimdi qylý», - dep atap ótti S. Shapkenov.

Taǵy da aıta ketetin jaıt, ákimdik elektrondyq formatta memlekettik qyzmetti jetildirý baǵytynda birqatar ister atqaryp jatyr. Máselen, onlaın-quraldardy aıtsaq bolady. Bul prosesterdiń barlyǵy birtindep kezeń-kezeńimen júzege asyp, avtomattandylady. Osy rette, jergilikti atqarýshy organdar arqyly 600-den asa qyzmet kórsetiletin bolady.

Qazirgi tańda ákimdiktiń ashqan mobıldi qosymshasy men chat-kanalynyń qyzmetin 7 myńnan astam turǵyn paıdalanady eken. Sondaı-aq, 2017 jyldyń qorytyndysy boıynsha Atyraý oblysy ákimdigi jáne halyqqa qyzmet kórsetý ortalyqtary arqyly 2,7 mln. qyzmet kórsetilgen. Onyń ishindegi 1 176 412 memlekettik qyzmet – HQKO-larǵa tıesili bolsa, 1 531 984 memlekettik qyzmet – ákimdiktiń qurylymdyq bólimshelerimen júzege asqan. Al, 2018 jyldyń basynan bastap halyqqa qyzmet kórsetý ortalyqtarymen 648 915, ákimdik arqyly 611 095 memlekettik qyzmet kórsetilipti.

---