InfoHub Logo

Mektep bitirgen jyly úlken aǵasy buǵan ózi de unatyp qalap júrgen ádebıettiń oqýyna barǵanyn qoldap, keńes bere otyryp, "oqımyn degen adamnyń bárine zań ortaq qoı" degen edi. Aǵasy aıtsa, aıtqandaı-aq, sol joly ózi qalaǵan oqýyna túse aldy. Sońǵy kýrsta júrgende, tarıh mamandyǵyna degen qyzyǵýshylyǵy oıandy jáne bolashaqta osy mamandyqqa tapsyryp kórýge degen maqsat qoıdy.

Muǵalimdik jumysqa ornalasyp, onyń alǵashqy jylyn ótkizdi. Sonan soń oıǵa alǵan maqsatyna saı, qujattaryn daıyndaı bastady da, biraq ishki oıy odan góri quqyq mamandyǵyna tapsyryp kórsem degen oıǵa tirele berdi. Bul joly apasyna eshteńe deı qoımady, aıtsam, kelisimin bere qoımas dep oılaǵany.

Qujattaryn ótkizgen kúnniń erteńine oqý ornynyń aýlasyndaǵy jıyndy kózi shaldy. Jıynda oqý ornynyń basshysy sóılep tur edi. Basshynyń aýzynan osy ýaqytqa deıin baspasóz betinde aıtylyp, biraq qoǵamǵa áli asa tanys bop kete qoımaǵan test, test ádisi degen sózder estilip jatty. Basshynyń aıtýynsha, endigi jerde oqýǵa qabyldaný úshin synaq tapsyrýdyń júıesinde ózgeris bolady. Emtıhan test ádisimen alynady. Bes birdeı pán bir jerge jınaqtalǵan. Eshteńe alyp kirýdiń keregi joq. Jaı qaryndash pen óshirgish jane suraq kitapshasy men jaýap paraǵy bolady.

Testiniń nátıjesine qarap óziniń jınaǵan baly boıynsha alda turǵanyn kórdi. Testileýdiń nátıjesine qarap-aq óziniń oqýǵa qabyldanǵanyn sezdi. Oılaǵanyndaı-aq, kelesi kúnderde oqýǵa qabyldanǵan stýdentterdiń tiziminde tur edi.

Bir aıdan soń bul birinshi kýrstan joǵary kýrsqa surandy. "Sen kúndizgi bólimge túsip tursyń ǵoı, - dedi buǵan osy jerdiń jaýapty, laýazymdy qyzmetkeri. - Ol syrttaı bólimde múmkin. Onda da ekinshi kýrstyń ózine múmkin degen sózdi ǵana aıta alam. Bul másele tek rektordyń ruqsatymen sheshiledi".

Kelesi kúni rektordyń qabyldaýynda boldy. Rektor munyń ótinishin tyńdap aldy da: "Meniń atyma aryzyńdy jaz. Men aryzyńa tıisti kýrsqa dep qana qol qoıyp beremin. Máseleni ári qaraı dekan sheshedi", - dedi. Shyǵyp bara jatqanynda, rektor qabyldaý ótkizip otyrǵan sátte, janynda kómekshisi bolyp turǵan azamat izinen daýystaı, ilese shyqty. "Qaǵazdaryńdy maǵan alyp kel, rektor seniń jumysyńdy maǵan tapsyrdy", - dedi. Sol azamat dekanǵa ózi alyp kelip: "Myna jigitke rektor ózi syrttaı bólimniń kelesi kýrsyna kóshýge ruqsat berdi", - dep tapsyryp shyǵyp ketken edi. Dekan:

- Ekinshi kýrstyń ózine ótý úshin birinshi kýrsty túgeldeı tapsyryp shyǵýyń kerek. On kún ýaqyt berem. Seniń burynǵy oqyǵanyń basqa, bul basqa. Seniń burynǵy oqyǵan sabaǵyń munyń ishinde joq. Qoǵamdyq pániń de basqa. Qoǵamdyq pánnen men bergem. Meniń sabaǵyma alańdamaı-aq qoı. Saǵan óz mamandyǵyńa baılanysty sabaqtar da az júk bolǵaly turǵan joq, - dedi.

Tizimde ómiri aty-jónin estı qoımaǵan beıtanys oqytýshylardyń esimderi tur edi. Bular buryn joǵary oqý oryndarynan zań mamandyǵyn alyp shyqqan, aldy zań iliminen ǵylymı jumystaryn qorǵaýǵa ázirlenip júrgen, jańadan qurylyp qalyptasa bastaǵan jas kafedranyń oqytýshylar quramyndaǵy oqytýshy mamandar edi.

Bir aı degende baryp qana birinshi kýrstyń sabaqtaryn tapsyryp dekanǵa alyp keldi.

Ekinshi kýrsqa qosylǵanda aldymen deneli, ıyqty kelgen jigit aǵasyn jolyqtyrdy. Osy topta oqıtyn bul azamat quqyq qorǵaý organynyń tájirıbeli qyzmetkeri eken. Memlekettik tergeý komıtetiniń tergeý qyzmetinde isteıtin, maıor shenindegi azamat bolyp shyqty. Artynsha-aq podpolkovnık shenine kóterilgen tergeý bólimshesiniń bastyǵy. Onyń janyndaǵy jigit aýdandyq ishki ister bóliminiń qyzmetkeri, aǵa leıtenant jigit eken. Bul jerde osy azamattardyń osy saladaǵy basqa da áriptesteri oqýshy edi. Odan keıingi jyldary oqý baǵdarlamasyna sáıkes, bulardyń kýrsynyń barlyǵyn da túgelimen quqyq qorǵaý organdarynan - sot, prokýratýra, ádilet, ishki ister organdarynan tájirıbeden ótip kelýge joldady.

Tórt jyldan soń qalalyq sot tóraǵasynyń aldynda sońǵy emtıhanyn tapsyryp otyrdy. Jaýaby "óte jaqsy" degen baǵaǵa baǵalandy.

Sonaý jyly aǵasy "bilim alamyn degen adamnyń bárine zań ortaq qoı" degen edi. Odan soń zaman jańardy. Keıingi qoǵam talapty ul-qyzǵa test ádisin usyndy jáne ony ýaqyt ótken saıyn jetildire túsýde. Keıingi zaman bilimdi ul-qyzdarǵa da, daryndy ul-qyzdarǵa da keńinen jol ashty. Oǵan olardyń aldyńǵy aǵa-apalarynyń qoly jete qoımaǵan múmkindikterge qarshadaıyn-aq jetip jatqandyǵy dálel. Buǵan derbestiktiń sharapaty tıip jatqandyǵy da kúmánsiz.

---